Komandante Jerál Polísia Nasionál Timor-Leste (PNTL) Komisáriu Asisténte Afonso dos Santos dehan, Unidade Polísia Marítima (UPM) ho Komponente Forsa Naval husi F-FDTL tenke servisu hamutuk atu kontrola rekursus iha Tasi Timor laran.
“Ita husu Unidade Polísia Marítima tenke servisu hamutuk ho Forsa Naval Lizeira hodi fortifika servisu kontrolu tasi nune’e hodi halo intervensaun ba atividade ilegál sira iha tasi Timor,” nia dehan.
Nia hatete, UPM tenke iha ligasaun servisu ho Naval hodi asegura tasi Timor tuir idak-idak nia tarjetu hanesan UPM hahú husi rai maran to’o 12 millas náutika, husi 12 millas ne’e ba kompeténsia Komponente Naval nian.
“UPM nia kompañeiru servisu mak Naval, servisu hamutuk, kordena malu hodi halo vizilansía ba tasi hodi proteje riku-soin Timor-Leste nian iha tasi atu ema labele na’ok no asegura katak ema seluk labele utilia ita-nia tasi halo tranzasaun ilegál.
Imi-nia prezensa iha tasi hodi asegura peskadór rai laran halo sira-nia atividade ho livre hodi sustenta sira-nia ekonómia uma laran,” Komisária Asistente Santos informa.
Iha fatin hanesan Komandante Unidade Polísia Marítima (UPM) Superientendente Xefe Eugenio Pereira dehan, servisu koordenasaun UPM ho Naval durante ne’e la’o di’ak tebes no idak-idak tuir nia área kompeténsia ne’ebé hatuur iha lei.
“Ita la’ós servisu hamutuk ho Naval de’it, maibé ho ajénsia hotu ne’ebé servisu kona-ba tasi hanesan Ajénsia Marítima Nasionál (AMN), Aportil, Peskas, Protesaun Sivíl, maibé kona-ba servisu vizilansía tasi UPM no Naval nian servisu,” nia informa.
Nia hatete, durante ne’e forsa rua-ne’e sempre iha komunikasaun servisu di’ak hodi halo atendimentu ba kazu ka dezastre ruma ne’ebé akontese iha tasi.
“Vizilansía tasi la’ós UPM ho forsa Mariña nian mesak, maibé entidade relevante hotu nian,” Komandante UPM Superintendente Xefe Pereira informa iha Licidere, Díli.Nia hatutan, kooperasaun servisu ho entidade hotu mantein hodi kontrolu tasi hodi halo intervensaun ba atividade ilegál sira hodi projete riku-soin iha tasi.
