Konstrusaun ponte Weelolo iha Suku Luca, Postu-Administrativu Viqueque, Munisípiu Viqueque, sei fasilita komunidade transporta produtu agrikola ba merkadu, tanba ne’e autoridade lokál husu atu aselera konstrusaun ponte refere.
Xefe Suco Luca, Manuel Gomes husu ba kompaña atu aselera lalais konstrusaun ponte hodi fasilita komunidade asesu ba merkadu no movimenta ba-mai.
“Tempu agora udan fali ona, se la book lalais mak udan mai, entaun ita labele halo buat ida, tanba ne’e husu ba kompaña, haree book neneik ona ba atu nune’e antes udan mai ita halo ona buat balun,” nia dehan.
Nia hateten antes konstrusaun ponte Weelolo, komunidade enfrenta difikuldade boot bainhira tempu udan no mota boot tun, halo ema la bele liu.
“Iha tempu udan, labarik sira la bele ba eskola, produtu agrikola la bele lori sai hodi fa’an, no ema mós hasoru risku bainhira halai liu mota. Tanba ne’e ho konstrusaun ponte foun ida ne’e, ema bele halo movimentu ba mai ho seguru,” hateten Chefe Suco Luca, iha sede Suco Luca, Viqueque.
Nia hatutan, agradese ba governua tanba implementa ona projetu konstrusaun ba ponte Weelolo ne’e.
Nune’e mos, Rosa Guterres, Komunidade husi aldeia Uma-Boot, deklara katak ponte ne’e fó mudansa boot iha sira-nia moris, tanba ne’e agradese ba Ministériu Obras Públika (MOP) ne’ebé implementa projetu ne’e.
“Ami senti kontenti bainhira ponte ida ne’e bele hadia, tanba durante ne’e ami-nia problema mak ponte. Maibe agora governu komesa halo ona lansamentu ba reablitasaun ponte ida ne’e bele fó benefisiu ba komunidade sira iha suku ida-ne’e. Tanba ne’e ami espera katak bele hotu tuir tempu ne’ebé termina ona, atu nune’e ami bele lori ai-han ba merkadu Buikarin no Viqueque kota,” nia hatete.
Nune’e Ministru ba Ministériu Obras Públikas (MOP), Samuel Marçal, esplika katak konstrusaun ponte Weelolo parte integral husi programa Governu IX Timor-Leste atu promove dezenvolvimentu infraestrutura básiza iha área rural.
“Ha’u fiar katak povu ida-ne’e seidauk lakon esperansa hodi pasiénsia nafatin hodi hein estadu ida ne’e hodi serví povu iha rai ida ne’e. Ha’u kontenti tebes povu ida ne’e nafatin iha pasiensia, mesmu hetan sofre durante tinan rua nia laran tanba Covid-19,” nia hatete.Nia hatutan, konstrusaun ponte sira hanesan prioridade Governu, transporte seguru mak baze ba dezenvolvimentu, ponte Weelolo sei kontribui atu aumenta movimentu ekonomia, ligasaun ba merkadu, eskola, no servisu saúde.
