Ministériu Edukasaun (ME) seidauk halo reabilitasaun ba eskola Centro Aprendizagem Formação Escolar (CAFE) iha Munisípiu Baucau ne’ebé mak hetan estragus husi inundasaun.
Koordenadór Rede Edukasaun Timor-Leste Coalition for Education (TLCE) Jose Monterio dehan, tuir monitorizasaun ne’ebé sira halo ba prosesu rekonstrusaun edifísiu eskolár sira ne’ebé afetadu husi dezastre naturais iha fulan abril tinan 2021 ne’e to’o ohin loron balun seidauk reabilitasaun.
“Ita haree hanesan eskola CAFE Baucau to’o ohin loron Ministériu Edukasaun seidauk halo reabilitasaun. Ita lahetene tanba saida,” nia kestiona.
Nia hatete, dadaun ne’e estudante sira husi eskola CAFE ne’e utiliza de’it eskola ensinu báziku ida iha Baucau, tanba sira laiha edifísiu rasik.
“Ita husu atu ME bele lalais halo levantumentu hodi konstrui foun ka reabilita fali eskola CAFE ne’e hodi fasilita estudante no profesór sira aprende iha fatin dignu ida-idak nian,” nia dehan.
Nia hatete, tuir loloos ne’e edifísiu eskolár sira ne’ebé hetan estragus iha tinan 2021 kauza husi dezastre naturais ne’e hadia hotu ona la’ós to’o ohin loron sei abandona hela.
“Ministéru tenke haree ida ne’e atu bele aselera lalais prosesu reabilitasaun,” nia haktuir.
Entretantu, Diretór Infraestrutura Edukativa iha ME, Helio Lopes dehan, kona-ba reabilitasaun ba eskola CAFE Baucau ne’e ministériu hala’o ona enkontru ho Prezidente Autoridade Munisípiu Baucau nune’e mós ho Koordenador Jerál ba Projetu CAFE kona-ba prosesu reabilitasaun ba eskola refere.
“Edifísiu eskolár refere seidauk halo reabilitasaun, tanba seidauk iha títulu loloos ba rai, maibé dadaun ne’e iha ona prosesu atu hetan títulu ba rai nune’e ita sei halo uluk moru protesaun depois ita halo reabilitasaun,” nia hatete.
Nia informa, atu halo konstrusaun ba edifísiu eskolár tenke identifika uluk títulu ba rai nune’e iha prosesu kontrusaun ne’e labele mosu dezintedimentu husi parte seluk.
“Ita rezolve uluk títulu ba rai loos ona mak ita tama fali ba prosesu reabilitasaun,” nia informa.Nia dehan, ME garante katak iha tinan 2026 ne’e prosesu reabilitasaun ba edifísiu eskolár eskola CAFE ne’e sei realiza, tanba ne’e husu ba estudante no profesór sira atu utiliza lai espasu ne’ebé mak durante ne’e sira utiliza ba prosesu aprendizajen.
