CNC Apoiu Finansiamentu Ba Asosiasaun Vítima Konflitu Pasadu 

Centro Nasionál Chega, Institutu Públiku (CNC.IP) apoiu finansiamentu ba  Asosiasaun  Vítima Konflitu Oasadu rua (2), Asosiasaun Vítima Konflitu Polítika 1974-1999 (AVKP), no Klibur Sobrevivente Feto PIRILAMPU, hodi fasilita implementasaun ba sira-nia programa no atividade sira.

Diretór Ezekutivu CNC Hugo Maria Fernandes dehan, apoiu finansiamentu refere liuhusi akordu ne’ebé halo ona ho asosiasaun rua-ne’e hodi implementa atividade sira ne’ebé mak planeia ona.

“Liuhusi akordu ne’e CNC apoiu finansiamentu ba asosiasaun rua ne’e ho montante la hanesan ba Asosiasaun Vítima Konflitu Politika 1974-1999 (AVKP) $25,000 no ba Klibur Feto Sobrevivente Feto PIRILAMPU ho montante $17.350,” nia informa.

Nia dehan, apoiu ne’e iha forma rua, ida apoiu tékniku oinsá mak integra programa sira CNC nia hamutuk ho atividade sira mai husi organizasaun, halo servisu koordenasaun iha edifisiu nasionál nomós iha terenu oinsá mak tulun malu no fahe esperiénsiano finansia programa ne’ebé sira rasik iha.

“Orsamentu ne’ebé ita apoiu ne’e asosiasaun sira tenke utiliza ho didiak hodi realiza programa no servisu sira ne’ebé ita mensiona ona iha leten,” Diretór Fernandes salienta.

Nia hatete, depois de implementa programa sira, ekipa ne’ebé forma ona husi CNC sei tun ba terenu hodi kontrolu servisu hirak ne’e la’o duni tuir akordu ne’ebé asina ona ka la’e no implementasaun ne’e másimu ka la’e.

“Bainhira iha implementasaun mak nia rezultadu zero CNC sei husu devolve fila orsamentu ne’ebé apoiu ona,” nia fundamenta.

Nia dehan, tenke utiliza orsamentu hirak ne’e ho di’ak no tuir programa ne’ebé planea ona hodi apoiu sobrevivente sira iha asosiasaun rua-ne’e nia laran.

Iha fatin hanesan, Koordenadór Nasional Asosiasaun Vítima Konflítu Polítiku 1974-1999 (AVKP), Domingos P. de Araujo Moniz, dehan agradese ba CNC IP ne’ebé kontinua fó apoiu ba sira hodi hala’o sira-nia atividade. Nune’e orsamentu ne’ebé simu sei uza ba funsionamentu servisu asosiasaun nian.

“Orsamentu sira-ne’e ami sei uza ba funsionamentu servisu asosiasaun nian. Nune’e ami agradese ba akordu servisu hamutuk ida-ne’e “, nia dehan.

Entretantu, Prezidente Klibur Sobrevivente Feto PIRILAMPU, Maria Isabel Jesus da Silva, dehan orsamentu ne’ebé sira simu, sei utiliza ba grupu feto sobrevivente sira hodi realiza formasaun kapasitasaun kona-ba oinsá halo negosiu kiik sira, hodi apoiu sistema ekonomia uma-laran nian, nune’e mós formasaun lideransa.”Ho apoiu tomak ne’ebé CNC fó oinsá ami bele hala’o ami-nia atividade ho di’ak liután ba oin, nune’e dezenvolve di’ak liután ita-nia servisu hamutuk ne’e, ami sei servisu didiak no oinsá sai parseiru ida ne’ebé di’ak hodi kontinua serbisu hamutuk ho CNC nomós asosiasaun sira seluk ,” nia promete.