Problema enerjia eletrisidade kontinua sai preokupasaun boot ba populasaun iha kapitál Díli no mós iha munisípiu sira, tanbane’e, komunidade kestiona servisu husi Eletrisidade de Timor-Leste, Empreja Publiku (EDTL, E.P.) nian, tanba eletrisidade kontinua mate-lakan.
Komunidade Aljira Miranda husi Suku Comoro Postu-Administrativu Dom Aleixo, Município Díli, hato’o lamentasaun ba situasaun ne’ebé fó impaktu negativu ba sira-nia moris loron-loron, no alende atrapalla atividade doméstika, komunidade mós tauk katak mate-lakan beibeik bele estraga sasan eletróniku sira.
“Ita sosa pulsa eletrisidade nian nafatin, maibé kbiit naroman la garante, loron ida bele mate dala tolu ka dala haat, ne’e estraga ami-nia sasán hanesan jelera no televizaun,” dehan Aljira iha nia Rezidénsia Comoro Díli.
Nia dehan, kondisaun ne’e halo família sira labele halo servisu normal, difikulta labarik sira atu estuda iha kalan, no negósiu hanesan kios, no servisu seluk ne’ebé depende ba korente eletrisidade nian.
Hatan ba kestaun ne’e, Ministru Ministériu Obra Públika Samuel Marçal fó esplikasaun katak eletrisidade mate lakan ne’e akontese, tanba afetadu husi servisu konstrusaun sira ne’ebé lao nune’e tenke hamate ahi.
“Durante prosesu konstrusaun no mudansa infraestrutura, presiza halo ajustamentu ba rede eletrisidade, ne’ebé dala ruma halo interrupsaun temporária ba fornesimentu korente, maibé karik fiu la soke entaun ita lapresiza hatemate ahi, maibé bainhira soke, entaun ita presiza hamate ahi,” nia esplika.
Ministru MOP Marçal garantia katak problema ne’e la’ós permanente, no tuir planu ne’ebé iha, fornesimentu eletrisidade sei fila fali ba normal no la mate lakan ona.“Ho situasaun ida-ne’e, komunidade kontinua husu ba EDTL no MOP atu haforsa komunikasaun ho povu, fó informasaun klaru kona-ba oráriu interrupsaun se iha, no garante katak servisu infrastrutura ne’ebé hela lao bele halo la prejudika liutan interese públiku”, dehan Ministro Marçal.
