Komisaun F iha Parlamento Nacional ne’ebé trata Asuntu Saúde, Igualdade no Inkluzaun Sosiál husu governu atu hasa’e kouta ba 30% ba feto iha rekrutamentu kadete foun sira ba Polísia Nasionál Timor-Leste (PNTL).
Prezidente Komisaun F, Maria Gorumali Barreto dehan, iha rekrutamentu kadetes foun ne’e prioridade ba feto iha de’it 20%, ida-ne’e lasufsiente no presiza aumenta kouta ba feto.
“Presiza hasa’e kouta husi 15% ne ba 30% ba feto iha rekrutamentu kadetes foun,” nia hatete.
Nia hatete, durante ne’e instituisaun PNTL hahú promove ona feto liu-liu iha promosaun diviza sira nune’e mós feto okupa kargu xefia sira.
“Kontinua fó prioridade ba feto iha rekrutamentu nune’e hodi promove partisipasaun feto nia pozisaun no rekrutamentu hotu iha Timor-Leste,” Prezidente Komisaun F Gorumali informa.
Nia salienta, Estadu Timor-Leste ratifika ona konvensaun internasionál sira hodi promove pastisipasaun feto iha setor hotu, tanba ne’e ema hotu iha responsabilidade atu halo ida ne’e.
Iha parte seluk, Ministru ba Ministériu Interiór (MI), Francisco da Costa Guterres dehan, rekrutamentu kadetes foun ne’e sei la fó liu prioridade ba feto maibé fó kouta ba feto iha 20% tuir desizaun ne’ebé iha.
“Ita fó kouta 20% ne’e atu bele hasa’e pastisipasaun feto iha institusaun PNTL husi 15% ba 18%. Tanba dadaun ne’e ita iha feto 15% mak servisu ona hanesan polísia,” nia salienta.
Nia dehan, iha prosesu rekrutamentu mak partisipasaun feto barak no iha abilidade di’ak sei hasa’e tan kouta pursentu feto nian.
“Iha rekrutamentu ne’e mak pastisipasaun feto lato’o pursentu ne’ebé iha maka ita sei buka dalan,” MI Guterres informa.Nia hatete, rekrutamentu kadetes foun ne’e la’o ho transparansia no sei laiha envolvimentu husi kotuk, maibé tuir de’it kriteria ne’ebé define ona.
