Inan faluk nain lima (5) husi Munisipíu Aileu, Baucau, Bobonaro, no Ermera sai benefisiáriu ba uma dignu ne’ebé konstrui husi Falintil-Forsa Defeza Timor-Leste (F-FDTL).
Xefe Estadu Maiór Jenerál Falintil Forsa Defeza Timor-Leste (F-FDTL) Tenente Jenerál Domingos Raul Falur Rate Laek dehan, konstusaun uma lima (5) ba inan faluk na’in-lima ne’e ligadu ho selebrasaun loron transformasaun FALINTIL ba F-FDTL ba dala lima nulu (50) hodi oferese ba sira, tanba durante ne’e sira hela iha uma ne’ebé kondisaun grave.
“Iha tinan ida-ne’e ita-nia inan faluk na’in-lima (5) ne’e mak sai benefisiáriu ba uma ne’ebé mak komandu (F-FDTL) oferese,” nia saliente.
Nia hatete, uma lima ne’e konstrui rasik husi forsa enjeñeira ho medida 9×12 uma refere kompostu husi kuartu tolu no sala rua no dapur iha laran kompleta kedan ho haris fatin no sintina ho total orsamentu $ 15 mil.
“Uma lima ne’e ita entraga ona uma rua ba inan faluk Maria Pereira iha Aldeia Kota Bauru, Suku Malere Postu Administrativu Aileu Vila, Munisípiu Aileu no Olinda Monterio Lopes iha Aldeia Betumumu, Suku Tirlolo Munisipíu Baucau no uma tolu (3) seidauk entrega, tanba konstrusaun seidauk finaliza,” nia salienta.
Nia hatete, uma ne’ebé komandu oferse ne’e hodi hametin lasu amizade entre militár ho nia povu sira. Benefisáriu hirak ne’e identifika husi xefe suku sira no aprezenta mai iha komandu no komandu hare katak inan faluk na’in-lima (5) merese atu sai benefisiáriu ba uma esperansa ne’ebé F-FDTL oferese.
Iha fatin hanesan benefisiáriu Maria Pereira kontente tebes, tanba hetan uma ida ne’ebé dignu oferese husi F-FDTL hodi bele tulun nia hamahon aan iha uma refere, tanba durante tinan barak nia hela iha uma ida ne’ebé ho kondisaun udan been tama.
“Ha’u kontente, tanba uma ne’e mós halo hotu ona ho kondisaun di’ak tebes,” nia salienta.
Nia hatete, uma ne’e nia sei hela ho nia beiaon ida no nia iha oan feto ida, maibé la besik nian.
Iha parte seluk Benefisiária Olinda Monterio Lopes, hato’o obrigadu ba Falintil- Forsa Defeza Timor-Leste ne’ebé konstrui ona uma ba nia ho família atu hela.
“Ha’u sente kontente ba Falintil- Forsa Defeza Timor-Leste nian ne’ebé konstui ona uma ba ha’u, ohin entrega ona ami família bele hela ba iha aban bainrua ne’e kontente no agradese tebes”, nia hatete.
Alende ne’e nia hatete, uma ne’e sira na’in 7 mak sei hela kompostu husi inan faluk ne’e no oan na’in 6.
