Komandante Polísia Munisípiu Díli Superintendente Xefe Orlando Gomes dehan, dadaun ne’e labarik barak mak utiliza motor-elétriku hodi surkula iha dalan públiku, maibé parte polísia labele halo intervensaun, tanba laregula iha lei.
“Sirkulasaun motor-elétriku ne’e laregula iha Lei Kódigu Estrada númeru 6/2003, entaun ita laiha kompeténsia atu kontrolu,” nia dehan.
Nia hatete, utilizasaun motor-elétriku liu-liu ba labarik sira-ne’e risku tebes ba labarik sira-nia vida, tanba ne’e inan-aman labele sosa motor-elétriku ba labarik sira no tenke kontrola oan sira.
“Atu kontrola motor-elétriku iha dalan públiku ne’e ita presiza lei espesífiku hanesan baze ida ba polísia hodi halo nia servisu,” Komandante Polísia Munisípiu Díli Superintendente Xefe Gomes informa.
Nia hatete, polísia hala’o nia servisu bazeia ba orden no lei, se lei laiha mak labele intervein no komunidade dehan polísia limite sira-nia liberdade.
“Ita nafatin husu ba inan-aman sira atu kontrola ona sira bainhira utiliza motor-elétriku atu nune’e oan sira labele monu ba risku,” nia husu.
Entretantu, Xefe Departamentu iha Sekretáriadu Apoiu Tékniku Administrasaun iha DNTT Nelson Sequeira Martins dehan, motor-elétriku ne’ebé dadaun ne’e sirkula iha Timor-Leste iha tipu rua (2) boot no ki’ik.
“Ida tipu boot autoriza sirkula, tanba bazeia nia velosidade iha Lei Kódigu Estrada fó dalan, ida ki’ik ne’e lautoriza, maibé labarik sira nafatin utiliza hodi sirkula iha dalan públiku,” nia informa.
Nia hatete, durante ne’e DNTT seidauk iha informasaun katak labarik balun ne’ebé uza motor-elétriku dezastre to’o lakon vida.Nia dehan, iha tempu besik DNTT ho Polísia Tránzitu sei tau atensaun ba asuntu ne’e no presiza realiza enkontru ida entre DNTT ho Polícia Nacional Timor-Leste (PNTL) hodi kontrolu sirkulasaun motor-elétriku iha estrada públiku sira.
