Governu liuhusi Ministériu Defeza Nasionál (MDN) iha tinan ne’e kontinua tau prioridade ba modernizasaun kapasidade militar no hadia kondisaun moris ba membru Falintil-Forsa Defeza Timor-Leste (F-FDTL) nian.
Ministru MDN, Kontra-Almirante Donanciano Pedro Klmar Fuik dehan, kada tinan Estadu iha nia komprimisiu hodi moderniza kapasidade kondisaun moris, no investe iha edukasaun, no saúde nune’e mós lojístika sira nune’e bele besik liu tan ba povu.
“Ita governu kontinua tau prioridade ba iha modernizasaun membru F-FDTL,” nia salienta.
Nia dehan, governu halo ida-ne’e atu militár sira hodi defende soberania, proteje rai, tasi no espasu aéreo, liu-liun proteje vida no dignidade ema ida-idak nian.
“Signifika prontu atu responde ba ameasa tradisionál no dezafiu foun sira. Prontu atu responde ba desastre natural, krize humanitária, krime transnacionál, peska ilegal, cyber ameasa no desinformasaun. Atu responde ba asuntu hirak ne’e governu presiza investe hodi moderniza kapasidade militár nian,” Minitro informa tan.
Nia salienta governu reforsa kapasidade rekursu umanu nian, inklui estabelesimentu akadémia militar to’o iha área apoiu sosiál, estabelesimentu kondisaun sira ne’ebé permite apoiu sosiál ba militár no família militár.
Entretantu, Xefe Estadu Maiór Jenerál Falintil F-FDTL, Tenente Jenerál Domingos Raul “Falur Rate Laek” hatete durante tinan 25 ne’e instituisaun militar iha dezafiu barak liu-liu iha rekursu umanu, lojístika no kondisaun ba militár sira, maibé nafatin prontu hodi servi povu no nasaun tuir misaun ne’ebe kaer.
“Ita-nia dezenvolvimentu kapasidade operasional sira ho investimentu rekursu humanu progresaun kareira no formasaun kontinua. Iha tinan ne’e sei implementa estatutu F-FDTL nian. Ita rekoñese sira ne’ebé luta ba libertasaun nian ne’ebé uluk hasoru susar ne’ebé aat liu hodi fakar ran iha ita-nia foho lolon sira,” Xefe Estadu Maiór Jenerál F-FDTL Tenente Jenerál Falur Rate Laek dehan.Nia dehan, tinan 25 konstrusaun lori istituisaun F-FDTL ba faze kritiku no konsolidasaun instituisaun armada nia esperansa no kontinuasaun ba futuru.
