Membru Falintil-Forsa Defesa Timor-Leste nain 25 kompostu husi feto ida no mane 24 finaliza ona kursu kapitaun no hein atu hetan promosaun diviza husi postu Tenente ba Kapitaun iha instituisaun F-FDTL.
Xefe Estadu Maiór Jerál Tenente Jenerál Domingos Raul Falur Rate Laek dehan, promosaun ba membru sira ne’e bazeia ba abilidade táktika no tékniku ne’ebé iha hodi responsabilidade ba asuntu seguransa nian no feto mós iha abilidade di’ak.
“Ohin membru F-FDTLna’in 25 finaliza ona kursu Kapitaun nian no iha tempu besik sei promove husi postu Tenente ba Kapitaun kompostu husi feto ida no mane nain 24 hodi responde ba asuntu inkluzaun iha instituisaun F-FDTL nain laran,” nia informa.
Nia hatete, orgullu ba kapitaun na’in 25 ne’ebé reprezenta marku desizivu iha progresaun kareira sira pesoál militar sira-nian no iha konsolidasaun institusionál F-FDTL nian.
“Ha’u kongratula Tenente ruanulu-resin-lima [mane ruanulu-resin-haat no feto ida] ne’ebé kompleta kursu ezijente ida-ne’e ho exelénsia no distinsaun. Ita-boot sira-nia realizasaun ne’ebé notável reflete ita-boot sira-nia kompromisu, disiplina, no dedikasaun ba ita nia rai-doben.
Ita-boot sira hatudu ona katak iha abilidade tékniku, tátiku no lideransa ne’ebé nesesáriu atu asume responsabilidade adisionál ne’ebé Postu-Kapitaun nian atribui ba ita-boot sira,” Xefe Estadu F-FDTL Tenente Jenerál “Falur Rate Laek” dehan iha Metinaro.
Nia dehan, Postu Kapitaun nia pozisaun reprezenta pontu importante iha kareira militár sira la’ós deit atu sai ezekutór no komandante iha nivel tátiku, responsavel mós ba lidera pelotaun no kompañia, treinu nia subordinadu sira, no ezekuta misaun operasionál sira ne’ebé kompleksu sira sei sai hanesan fundamentu ba unidade sira, ligasaun vital entre pensamentu estratéjiku no asaun iha terenu.
Nia informa ba oin komandu kontinua fó oportunidade ba militár feto sira hodi asumi kargu xefia no komandu postu sira tuir postu ne’ebé sira hetan.
Entretantu, Tenente Leandra Gonzaga hato’o agradese ba Komandu F-FDTL ba kursu kapitaun ne’ebe mak durante ne’e sira partisipa no ohin bele finaliza ona formasaun ida ne’e ho di’ak, formasaun refere realiza iha sentru formasaun Komandante Nicolau Lobato Metinaro.
“Liuhusi formasaun ida ne’e atu bele reforsa liutan sira nia profesionalidade hodi servi estadu ida ne’e ho profesionalismo ne’e sira hetan,” nia hatete.Enkuantu pomosaun ida-ne’e hodi responde ba asuntu inkluzaun iha instituisaun F-FDTL, maske seidauk másimu, maibé komandu nafatin esforsu hodi bele ba oin bele dezenvolve di’ak liutan asuntu Igualdade Jéneru iha militár.
