Komunidade husu atu hadia servisu bombeiros nian hodi fó servisu atendimentu ba akontesimentu insendiu sira ho lalais, nune’e bele salva ema nia vida ho sasan sira.
Vítima Carlos da Costa nu’udar komunidade husi Aldeia 12 de Outobro, Suco Comoro dehan, atendimentu servisu bombeiros ba dezastre naturais liu-liu insendiu ekipa sempre halo atendimentu tarde.
“Hanesan komunidade lamenta tebes ho servisu atendimentu bombeiros nian hodi atende insendu sira,” nia hatete.
Nia dehan, servisu bombeiros ne’e tenke preparadu antes, bainhira iha kontaku kona-ba insendu bele atende ho lalais, la’os hetan kontatu mak foin buka kondutor no foin ense bee.
“Ita haree katak akontesimentu ahi han uma sira durante ne’e atendimentu bombeiros lasusesu, tanba lasalva sasan nune’e mós ema nia vida,” Vítima Costa dehan iha Comoro.
Nia dehan, liga ba aktu tarde sira ne’e presiza hasa’e koñesimentu ba korpu bombeiros nian nune’e bele iha kapasidade di’ak ba servisu atendimentu sira.
Iha parte seluk motorista Abel Ximenes dehan, ahi han mikrolete zero 10 ne’ebé nia utiliza hodi sirku tula pasajeiru sira, nia kontaktu ba bombeiros antes, maibé atendimentu to’o tarde.
“Aimutin ba Kaikoli ne’e lado’ok, maibé, tanba saida mak tenke tarde no sira to’o mai ho razaun tarde, tanba engrafamentu, serake kareta bombeiros laiha lampu emerjénsia,” nia informa.
Nia dehan, husu bombeiros tenke halo atendimentu ho seriu hodi salva guarda ba komunidade iha situasaun emerjénsia sira la’os to’o tarde ona mak razaun 1 engrafamentu hela de’it.
Entretantu, Prezidente Autoridade Protesaun Sívil (APC) Jesuino Matos dehan, atendimentu tarde ne’e APC rekoñese katak loos duni situasaun hirak ne’e sempre akontese.
“Atendimentu tarde ne’ebé ita hasoru ne’e, tanba kestaun ita-nia estrada ne’ebé kloot nune’e mós karreta no motorizada sirkulasaun barak ikus hamosu engrafamentu ita labele ultrapasa lalais ” nia dehan.Nia informa ba oin APC sei hadia liutan servisu atendimentu ba situasaun emerjénsia sira, liuhusi prepara rekursu umanu ne’ebé di’ak no ekipamentu ne’ebé mak modernu hodi fasilita servisu korpu bombeiros nian.
