Ministériu Ensinu Superiór Siénsia no Kultura (MESSK) tinan 2026 ne’e haruka tan dosente husi universidade privadu hamutuk na’in 30 ba estuda lian portugés iha nasaun Portugál no Brázil hodi dezenvolve lian portugés iah rai laran di’ak liutan.
Ministru ba MESSK Jose Honorio da Costa Pereira Jerónimo dehan, politíka haruka dosente sira ba estuda lian Portugés, tanba liga ba implementasaun kurríkulu padraun nasionál universitária katak universidade hotu tenke hanorin ho lian Portugés.
“Iha tinan ne’e MESSK haruka tan dosente husi universidade privadu hamutuk na’in 30 ba estuda lian Portugés iha nasaun rua hanesan, Portugál no Brázil iha nível doutoramentu no mestradu hodi promove di’ak liu tan sira-nia kompeténsia iha lian portugés,” Ministru MESSK Jerónimo informa iha UNTL, Díli.
Nia dehan, MESSK kada tinan sempre haruka dosente husi universidade privadu sira ba hala’o estudu kona-ba lian portugés nune’e bele hanorin estudante sira iha eskola.
“Ita haree hanesan, UNTL, no universidade privadu balun hanesan, Universidade Católica Timorense (UCT), Instituto São João de Brito, sira hahu aula ho portugés, ha’u hanoin ema hotu hakarak aprende ho lian portugés,” nia salienta.
Nia hatete, lian portugés ne’e sai ona lian ofisiál, nune’e mós tama iha kurríkulu nasionál ensinu superiór na’in tanba ne’e hakarak ka lakohi ema hotu tenke utiliza iha eskola.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, universidade privadu sira atu hanorin no lian Portugés presiza governu nia apoiu liuhusi kapasitasaun ba dosente sira.
“Apoiu liuhusi formasaun lian Portugés tantu iha rai liur no rai laran, fó bolsu estudu ba dosente sira liu-liu kona-ba lian Portugés,” nia hatete.
Nia dehan, atu solusiona problema universidade sira utiliza lian Portugés hodi hanorin MESSK tenke investe iha formasaun kapasitasaun ba lian Portugés ba dosente sira.
“Dalan ida mak dadaun ne’e MESSK halo oferese bolsu estudu ba dosente sira hodi ba hala’o estudu lian Portugés iha Portugál no Brázil ne’e,” nia informa.
Nia hatete, depois de sira fila bele implementa iha prosesu aprendizajen nune’e mós MESSK labele husik de’it, maibé tenke halo monitorizasaun ba utilizasaun lian Portugés iha prosesu aprendizajen liu-liu iha universidade sira hodi haree nia rezultadu.Enkuantu durante ne’e MESSK haruka ona dosente husi universidade privadu sira ne’ebé mak ativu hamutuk na’in 25 mak hala’o estudu lian Portugés no fila mai hanorin ona iha universidade privadu sira.
