
Organizasaun Naun Govermental (ONG) Rede Edukasaun Timor-Leste Coalition for Education (TLCE) sujere ba Ministériu Edukasaun (ME) atu fó programa merenda eskolár ba Ministériu Saúde (MS) mak jere.
Koordenadór TLCE Jose Monteiro dehan, objetivu husi implementa merenda eskolár ne’e atu kontribui hasa’e nutrisaun tuir nesesidade estudante sira-nian, tanba ne’e MS mak hatene liu kona-ba nutrisaun, la’ós Ministériu Edukasaun ka Ministériu Administrasaun Estatal (MAE).
“TLCE sujere programa merenda eskolár di’ak liu fó ba Ministériu Saúde (MS) mak jere, tanba sira mak iha kapasidade hodi hasa’e nutrisaun estudante nian,” nia informa.
Nia hatete, objetivu husi merenda escolar ne’e atu hasa’e nutrisaun estudante nian no abilidade estudante nian, maibé fó fali ba ministériu ida ne’ebé mak laiha koñesimentu ba asuntu ida ne’e, di’ak liu taka tiha selae estraga osan de’it.
“Fó ba MS mak jere karik sira laiha rekursu umanu tenke rekruta fali estudante finalista sira iha área saúde nutrisaun nian fó formasaun ba sira nune’e bele implementa,” Koordenadór TLCE Monteiro informa.
Nai hatete, tenke sériu atu hadia mal nutrisaun labarik sira nnia, mekanizmu ida de’it mak entrega merenda eskolár ba MS, depois mak bele koopera ho ME.
Nia dehan tan MS bele organiza no fó formasaun, oinsá prepara aihan nutritivu bazeia ba nesesidade labarik idaidak nian.
“Pessoal nutrisaun sira ba halo analiza ba estudante sira se mak presiza proteina barak, se mak presiza vitamina barak, ita bele iha lista ona no entrega ba kuzineira sira atu prepara aihan tuir labarik idak-idak nia saúde,” nia informa iha knaar fatin.
Nia dehan, merenda eskolár la’ós Ministériu Administrasaun Estatal (MAE) nia kompeténsia, tanba sira-nia kompeténsia mak organiza komunidade atu labele okupa resintu eskola no espasu públiku sira.
Entretantu Sekretáriu Estadu Sekundáriu Jerál no Ensinu Sekundáriu Tékniku Vokasionál iha ME Domingos Lopes Lemos hatete, programa merenda eskolár ne’e implementa husi ministériu servisu hamutuk ho Ministériu Saúde (MS).
“Kona-ba menu ministériu relevante rua mak kria iha manuál no Ministériu Administrasaun Estatal (MAE) jere kona-ba orsamentu implementasaun nian,” nia hatete.Nia rekomenda, karik sira husi sosiedade sivíl governu konsidera nune’e bele hadia iha futuru oinsá bele hadia nutrisaun ba estudante sira.







