Eskola Sekundáriu Gerál (ESG) Fitun Naroman Timor Lorosa’e (FINANTIL), iha kapital Dili, presiza tan professór hodi hanorin materia tolu lian Tetun, Portugés no Desportu, tanba Ministériu Educação (ME) realoka profesor na’in-18 atu hanorin iha eskola sira seluk iha rai laran.
Diretór ESG-FINANTIL, Aniceto Berlelo hatete, antes ne’e sira iha profesór kompletu hodi responsabiliza kada matéria, maibé ho kolokasaun professór ne’ebé ME halo entaun professór ne’ebé antes ne’e hanorin koloka fali ba fatin seluk, no afeta ba menus profesór.
“Tuir loloos kolokasaun profesór ne’e hodi kompleta problema menus professór iha eskola sira, maibé foti professór husi eskola ida ba hanorin fali iha eskola seluk otomatis eskola anterior tenke enfreta problema falta professór,” nia informa iha knaar fatin, Comoro, Díli.
Diretór haktuir katak bainhira ME atu halo kolokasaun ba professór sira, tuir loloos tenke konfirma ho diretór eskola sira hodi hatene eskola iha professór ne’ebé mak natoon ba matéria sira ka lae.
“La’ós koloka de’it ho ida-ne’e ami ohin loron enfrenta fali falta professór ba matéria tolu,” Diretór ESG FINANTIL Berlelo hatete.
Nia hatete, antes ne’e iha profesór hamutuk na’in hitu-nolu-resin-walu (78) ba sala de aula hamutuk 14, iha dader no lokraik, maibé iha kolokasaun ida ne’e sira foti fali profesór husi ESG FINANTIL nian hamutuk na’in 18 hodi koloka fali iha eskola seluk.
“Ami lamenta ho Ministériu Edukasaun, tanba halo tiha kolokasaun ba professór na’in-18 husi eskola FINANTIL ba eslola sira seluk,” nia salienta.
Nia dehan, atu rezolve problema menus professór ne’e husi eskola hatama ona karta ba Ministériu Edukasaun hodi bele responde nesidade refere tanba dadaun ne’e anu letivu foun atu hahú la’o ona.
Entretantu, Diretór Nasionál Rekursu Umanu iha ME João Amaral dehan, liga ho menus professór iha ESG- FINANTIL ne’e ministériu servisu hamutuk ho diresaun ensinu atu bele koloka professór ba eskola referidu.
Nia dehan, situasaun ne’e eskola hotu enfrenta, maibé antes atu halo xamada no kolokasaun ministériu sei identifika uluk eskola.
“Molok ita atu halo xamada no kolokasaun ba professór, primeiru ita iha uluk kuadru pesoal, depois ita mós sei identifika uluk eskola sira-nia nesesidade, hafoin ita halo kolokasaun,” nia informa.Nia hatete, ligadu ho problema menus professór ba matéria tolu iha FINANTIL, ministériu sei servisu hamutuk ho diresaun ensinu sira hodi halo fali kolokasaun ba eskola refere.
