Movimentu Juventude Postu Administrativu Ossu, Munisípiu Viqueque, husu Ministériu Edukasaun (ME) atu reativa eskola paralelu Sekundáriu Jerál Ossu-Ala hodi fasilita estudante sira asesu besik ba eskola.
Porta-Vos Movimentu Juventude Ossu Jose Gomes dehan, eskola paralelu Ossu-Ala ne’e eziste desde tinan 2023 ho objetivu atu lori edukasaun liu-liu iha nivel sekundáriu besik ba estudante sira iha suku neen (6), iha Postu Admistrativu Ossu, Nahareka, Waigia, Osurua, Wabobo, Waibono no Builo.
“Ami movimentu juventude Ossu husu Ministériu Edukasaun atu reativa fila fali eskola sekundáriu paralelu Ossu-Ala Waigia hodi fasilita estudante iha suku neen (6) tuir prosesu aprendizajen iha ano letivu 2026 nian,” nia dehan.
Nia dehan tan, tinan 2025 fulan Dezembru ME hasai diploma ministeriál númeru 13 de Agosto/2025 hodi taka tiha eskola refere ho razaun katak la prense kritéria, maibé na realidade eskola refere priense ona kritéria hitu (7) kona-ba loke klasse apralelu nian.
“Razaun ne’ebé ita simu husi ME hodi taka eskola ne’e katak la priense kritéria iha rekursu umanu la sufisiente no estudante rejistadu la tuir númeru estandar ne’ebé iha, tanba ne’e ita atu klarifika de’it katak ne’e laloos,” Porta-Vos Gomes hatete.
Nia informa, eskola refere iha profesór hamutuk 18 permanente na’in -tolu (3) no kontratadu, iha tinan 2025 ne’e rejistrasaun estudante hamutuk 50 maibé Edukasaun MunisípiuViqueuqe mak la enkamina lista hirak ne’e ba ME.
“Ami husu ba ministériu halo fali desizaun loke fali eskola ne’e atu estudante sira bele hahu aula, se lae ami sei organiza malu mai halo protestu iha Ministériu Edukasaun,” nia saliente.
Nia hatete, eskola refere priense ona rekejitu hitu (7) ne’ebé atribui husi oitavu governu liuhusi Ministériu Edukasaun (ME) hanesan, rai rasik, rekursu rasik, tenke bazéia ba Konstitusaun RDTL artigu 59 katak tenke priense lalaok kulturál nian, no estudante tenke tuir estandar maximu kada tinan tenke iha 120 estudante.
Entretantu Diretór Jerál Ensinu Sekundáriu Jerál do Ensinu Sekundáriu Jerál iha ME Benjamin Fernandes dehan, despaixu ministeriál ne’ebé mak ME hasai hodi taka eskola refere tuir monitorizasaun ne’ebé mak edukasaun munisípiu sira aprezenta mai katak eskola refere la priense kritéria.
“Kritéria ne’ebé eskola refere la priense mak hanesan, rekursu umanu rasik la másimu no estudante la tuir estandarte ne’ebé mak iha,” nia hatete.Nia dehan tan, liga ba preokupasaun sira-ne’e hotu ME konsidera no ekipa sei tun direta hodi haree fila fali oinsá, priense duni kritéria ka lae, se priense sei reativa fila fali se la priense hakarak ka lakohi tenke taka.
