Primeiru-Ministru (PM) Kay Rala Xanana Gusmão, husu ba funsionáriu públiku hotu atu servisu makaas no hala’o knaar ho responsabilidade, integridade no kompromisu, tanba funsionáriu sira mak xave prinsipal atu garante polítika no programa Governu hodi fó benefísiu loos ba povu iha tinan 2026.
“Tanba ne’e, ha’u husu ba parte hotu-hotu atu hahú tinan ne’e [2026] ho sentidu responsabilidade no serbisu ho di’ak. Karik ema hotu la hala’o sira-nia knaar, dezenvolvimentu sei nunka avansa,” PM Gusmão dehan.
PM hateten katak governu seidauk bele hetan rezultadu ne’ebé di’ak, se funsionáriu sira la servisu ho disiplina, transparénsia no sentidu responsabilidade.
“Ema hotu tenki halo esforsu. Tinan ne’e ita tenki hatudu ba públiku katak ita hadi’a ona, no iha tinan oin mai ita tenki hatudu katak ita harii liu tan. Aproveita momentum ne’e hodi hadi’a kapasidade servisu nian iha instituisaun estadu ida-idak, ho hanoin ida de’it atu serbi nasaun no povu”, nia insisti.
Nia afirma, responsabilidade funsionáriu mak fundasaun boot ida ba dezenvolvimentu nasaun. Se funsionáriu halo nia knaar ho loos no ho sentidu servisu ba povu, entaun governu sei bele fó rezultadu ne’ebé povu sente no haree loos iha nia moris loroloron
Iha perspetiva akademista Mariano dos Resi husi Universidade da Paz, responsabilidade funsionáriu mak sai hanesan sinal pozitivu ida ba hadia kualidade governasaun.
“Governu presiza la’ós de’it halo planeamentu di’ak, maibé tenke garante mos katak funsionáriu hotu iha kapasidade no vontade atu implementa polítika sira ho di’ak. Formasaun kontinua, avaliasaun performánsia no sistema responsabilizasaun ne’ebé klaru mak sai xave atu hetan rezultadu di’ak,” hateten akademista ne’e.
Mariano observa katak programa governu la hetan rezultadu másimu la’ós tanba falta polítika di’ak, maibé tanba implementasaun ne’ebé la loos, falta monitorizasaun no fraku iha responsabilidade funsionáriu sira-nian.Nia mós aumenta katak envolvimentu funsionáriu ho komunidade no atensaun ba nesesidade lokal sei ajuda governu implementa programa ne’ebé liu tan relevante ba povu nia moris.
