Ministra ba Ministériu Edukasaun (ME) Dulce de Jesus Soares dehan, dezenvolvimentu pré-eskolár iha Timor-Leste sai prioridade ba iha implementasaun programa ME nian. Tanba edukasaun pré-eskolár mak reprezenta pasu dahuluk harii sosiedade ne’ebé edukativu inkluzivu no sai baze ba dezenvolvimentu abilidade estudante nian kona-ba literásia no numerásia.
“Pré-eskolár baze ba dezenvolvimentu literásia no numerásia ba labarik sira molok ba primária,” nia hatete.
Ministra hatete, molok labarik sira tama ba primária sira hatene ona letra nune’e mós númeru, kor, no aifuan.
“Ita-nia politíka Nasionál Edukasaun Pre-eskolar ne’ebé esplika prioridade estratéjika 5, inklui habelar asesu ba pré-eskolár ho di’ak ba labarik tinan 3 to’o 5,” nia salienta.
Nia hatete, prioridade 5 mak hanesan, formasaun ba profesór, dezenvolvimentu kurríkulu, haforsa envolvimentu inan-aman, komunidade no promove prátika edukasaun inkluziva sira.
“Ita hadia kualidade edukasaun infansia, hodi garante katak labarik sira dezenvolve abilidade sólidu kona-ba literásia no numerasia molok tama iha eskola primária. Ita presiza hametin kolaborasaun iha nivel nasional, munisípiu no komunidade, hodi haburas aprosimasaun koordenada no olístika hodi implementa programa edukasaun infansia nian,” nia dehan.
Enkuantu nia dehan, realidade, iha Timor-Leste asesu sei limitadu ba edukasaun pré-eskolár ho kualidade aas, no ambiente aprendizajen ne’ebé seguru no ba estudante sira hodi alkansa sira-nia potensialidade.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, ensino pré-eskolár hanesan baze fundamentu ba edukasaun, maibé durante ne’e ME ladun konsidera.
“Ita haree pré-eskolár iha Timor-Leste maiória privadu, públiku ne’e ituan liu, ida-ne’e hatudu katak ME la tau importansia,” nia dehan.
Nia hatete, husi totál pré-eskolár 350 ne’ebé eziste iha Timor-Leste maiória privadu.Enkuantu nia informa, tuir planu ME nian ba tinan 2024 liu katak atu instala pré-eskolár hamutuk 599 iha suku sira iha territóriu laran, hodi fasilita labarik tinan 3 to’o 5 asesu ba edukasaun maibé seidauk realiza hotu.
