Inspeção Geral do Jogo (IGJ) konsidera jogu ilísitu nu’udar krime, tanba lahetan lisensa hodi formaliza sira-nia atividade.
Inspetór IGJ iha Ministériu Turizmu Komersiu no Ambiente (MTKA) Anibal Carvalho Martins dehan, jogu ilísitu sira ne’ebé la’o ona iha Timor-Leste ne’e krime, tanba laiha lisensamentu husi governu.
“Ita lakonsidera atividade jogu ilísitu sira, ida-ne’e krime no kompeténsia Polísia Nasionál Timor-Leste (PNTL) no Polísia Sientifika Investigasaun Kriminál (PCIC) nian hodi submete ba prosesu,” nia hatete.
Nia hatete, hanesan foin lalais akontese iha Oe-Cusse polísia identifika jogu ilísitu, sira halo kedan aprensaun no kapturasaun ba ema hirak ne’ebé organiza atividade jogu ilegál ne’e.
“Ita halo kontrolu de’it ba jogu sira ne’ebé rejistu no kuandu sira lahalo tuir atividade ne’ebé hakerek iha lisensa ita sei fó sansaun, multa ki’ik liu mak $1000 no kuandu grave liu mak 20,000,” Inspetór IGJ Carvalho dehan.
Nia informa, bainhira aplika multa mak halo nafatin maka hakarak ka lakohi tenke taka no la autoriza loke tan.
“Jogu ne’ebé ita rejistu mak hanesan, Lotaria, Dragon, Kiss, Rudal, Amizade, Timor-poll, Toto-Fitun, no iha makina nian mak MDG Holding, Timor Holding, Unlong Unipesoal, LDA no jogu online iha hitu (7) mak rejistu ona hodi hala’o sira-nia atividade iha Timor-Leste,” nia informa.
Nia dehan, nafatin husu ba emprezariu sira hakarak halo atividade jogu nian tenke hetan lisensa no hakarak halo jogu subar kompetensia instituisaun relevante entidade hotu tenke kontrola, kompeténsia liu ba servisu investigasaun Polisia Nasional PNTL ho Polísia Sientifika Investigasaun Kriminál (PCIC) tanba sira-nia servisu kaer prosesu ba tribunal.
Entretantu, Portavós PCIC Mario Tavares hatete, foin dadaun sira hamutuk ho komunidade intelijénsia halo operasaun ho naran Clear Online Scan iha Rejiaun Administrativu Espesiál Oe-kusse Ambeno (RAEOA) hodi halo inspesaun ba fatin jogu ilísitu ida iha RAEOA konsegue detein suspeitu na’in-sanolu (10), tanba envolve krime jogu ilísitu no burla informátika.
“Suspeitu nain 10 ne’e dadaun ne’e ita aprezenta ona ba tribunál hodi kontinua prosesu,” nia hatete.
Nia hatete, iha prosesu identifikasaun ne’e identifika katak suspeitu hirak ne’e komete krime rua jogu ilísitu no burla informátika, tanba autór hirak ne’e habosok ema hodi transfere osan ba sira.Enkuantu nia dehan, PCIC sei lahusik livre atividade jogu ilísitu iha Timor-Leste, ba se de’it mak komete tenke prosesu tuir lei ne’ebé vigór.
