Inspeção Geral do Jogo (IGJ) iha Ministériu Turizmu Komersiu no Ambiente (MTKA), durante ne’e liuhusi atividade inspesaun ne’ebé sira halo konsegue kontribui ona reseitas hamutuk besik 10 milloens dolares amerikanu ba kofre estadu.
Inspetór ba IGJ Anival Carvalho Martins dehan, reseitas hirak ne’e rekolla husi empreza sira ne’ebé rejistu hanesan, Lotaria, Dragon, Kiss, Rudal, Amizade, Timor-poll, Toto-Fitun, no iha makina nian mak MDG Holding, Timor Holding, Unlong Unipesoal, LDA no jogu online iha hitu (7) mak rejistu hodi hala’o sira-nia atividade iha Timor-Leste.
“Husi jogu 17 ne’ebé rejistu ne’e mak ita rekolla ona reseitas hamutuk $9,898,401.14 ba kofre estadu,” nia hateten.
Nia hateten, reseitas hirak ne’e rekolla hahu husi 2023 hamutuak $3,741,660.30, no iha tinan 2024 hamutuk $3,917,821.91.
“Ba ami sei servisu makaas tuir rekursu no kapasidade naton ne’ebé ami iha, hodi hasa’e tan montante reseitas ba kofre estadu,” IGJ Martins dehan iha nia knaar fatin.
Nia hateten, servisu kontrolu ne’ebé durante ne’e sira halo no manual de’it, maibé ba oin sei utiliza sistema kontrolu dijitál.
“Alende ne’e mós ita sei koordena no parseiru internasionál sira hodi fasilita formasaun ba ita-nia funsionáriu sira hodi bele hasa’e sira nia skill hodi halo kontrolu ba aktividade jogu ne’ebé dadaun ne’e la’o hela,” nia hateten.
Enkuantu nia hateten, totál funsionáriu ne’ebé mak dadaun ne’e halo servisu iha IGJ hamutuk na’in 50.
Iha parte seluk Deputada Lídia Norberta Martins dehan, durante ne’e ema barak mak lahatene katak atividade jogu sira refere kontribui reseitas ba estadu.
“Maibé rezultadu hatudu katak Ministériu Turizmu no Ambiente liuhusi diresaun Inspesaun Jerál do Jogu mós kontribui reseitas ba kofre estadu, sira okupa númeru terseiru depois de Alfandega no Servisu Migrasaun, ida-ne’e haatudu rezultadu servisu di’ak tebes,” nia hateten.
Nia dehan, sira-nia prestasaun servisu di’ak tebes, no ba oin kontinua servisu ho di’ak tuir kapasidade ne’ebe iha hodi kontribui reseitas ba kofre estadu.”Ita sei apoiu sira liuhusi aprovasaun orsamentu hodi bele kria kondisaun atu bele fasilita sira-nia servisu,” nia hateten.
