Ministériu Edukasaun (ME) distribui ona livru manual hamutuk atus-ida (100) ba eskola Ensinu Sekundáriu Tékniku Vokasionál (ESTV-IT) 28 Novembru Becora hodi fasilita estudante sira aprende.
Diretór Nasionál Ensinu Sekundáriu Jerál no Tékniku Vokasionál ESG-ESTV Benjamin Fernandes dehan, livru manúal ne’ebé distribui ba departamentu rua iha ESTV-IT, tanba durante ne’e sira laiha livru hodi fasilita prosesu aprendizajen.
“ME distribui livru hamutuk atus-ida (100) ba eskola ne’e hodi ajuda profesór sira hanorin nune’e mós estudante sira bele utiliza mós livru hodi akompaña,” nia hatete.
Nia hatete, livru hirak ne’e kona-ba informatika no eletronika, eskola 28 ne’e Tékniku Vokasionál IT no sira iha departementu rua hanesan informátika no eletronika.
“Livru manual atu-ida (100) ida ne’e ita sente ne’e sufisiente ba profesór no estudante sira hodi utiliza,” nia informa.
Nia hatete, sira la’ós laiha liu livru maibé, livru iha mas lasufisiente, tanba ne’e Ministériu Edukasaun distribui tan hodi kompleta tiha.
“Ita husu ba profesór sira atu kontrola livru hirak ne’e atu nune’e labele lakon no aat nune’e bele utiliza ba tempru naruk,” nia dehan.
Entretantu Diretór Eskola Ensinu Sekundáriu Tékniku Vokasionál (ESTV-IT) 28 Novembru Tomas Pinto dehan, ho livru ne’ebé distribui husi Ministériu Edukasaun ne’e, bele rezolve ona problema menus livru.
“Livru manual ba estudante sufisiente no agora dadauk mós livru ba informatika no eletronika nian ne’ebé iha hela bibiloteka eskola nian, tau hamutuk sufisiente ona ba estudante sira,” nia salienta.
Nia hatete, espera katak sei laiha tan problema kona-ba livru no ba oin estudante sira bele asesu ba livru hodi aprende.Alende ne’e nia dehan, dadaun ne’e difikuldade ne’ebé sira iha mak kadeira no meza seidauk sufisiente ba estudante sira, tanba balun aat ona.
