Diretora ba Diresaun Nasionál Rejistrasaun Komunitaria (DNRK) iha Ministériu Solidariedade Sosiál no Ikluzaun (MSSI) Manuela Oliveira Martins dehan kazu na’ok ne’e atividade ne’ebé loloos labele akontese no labele envolve husi labarik minoridade, tanba ne’e perigu.
“Ita konsidera katak labarik minoridade hirak ne’ebé envolve iha na’ok ne’e, tanba menus kontrolu husi família uma-laran liuliu inan-aman sira,” Diretora DNRK Oliveira informa.
Nia dehan, maibé realidade ne’ebé iha labarik minoridade mak envolve ona, tanba ne’e atu redus ka kontrolu labarik sira envolvimentu iha kazu fila fali ba inan aman.
Nia hatete, inan-aman nia papél importante hodi asegura oan sira labele envolve iha kazu ida ne’e, tenke husu tuir oan sira bainhira tama no sai husi uma labele husik sira ransu livre.
“Dalaruma mós iha grupu organizadu balun mak envolve iha aktu ida-ne’e, tanba ne’e ita husu parte polísia tenke buka tuir nune’e ema labele utiliza labarik sira hodi realiza saida mak sira-nia hakarak,” nia informa.
Alende ne’e nia dehan, MSSI nafatin servisu hamutuk ho Institutu Nasionál Defeza Direitu Crianças (INDDICA) no Polísia Nasional Timor-Leste (PNTL) hodi bele halo prevensaun ba envolvimentu labarik minoridade iha na’ok.
Iha parte seluk Komandante Polísia Munisípiu Díli Superintendente Xefe Orlando Gomes dehan, labarik minoridade ne’ebé envolve iha kazu na’ok polísia identifika lori ba iha komandu hodi presta deklarasaun.
“Ita bolu inan-aman no eduka inan-aman sira atu eduka no kontrola oan sira labele hamutuk ho ema bo’ot hodi na’ok ema nia sasan,” nia dehan.
Nia dehan, polísia mós esforsu para halo sensibilizasaun ba eskola sira no komunidade no autoridade lokál sira hodi kontrolu labarik sira atu labele envolve iha na’ok.
“Ita utiliza meiu ne’e atu ita bele halo prevensaun no labarik sira tenke eduka komesa agora nune’e bele sai joven ne’ebé di’ak ba fururu nasaun nain,” Komandante Polísia Munisípiu Díli Superintendente Xefe Gomes informa.Alende ne’e nia dehan, husu inan-aman tenke eduka no morál kontrola oan sira papél família importante ba prevensaun kazu na’ok.
