Durante ne’e Instituto Nacional Defesa Direito das Crianças (INDDICA) servisu hamutuk ho Ministériu Edukasaun hodi fasilita labarik na’in ne’ebé durante ne’e faan mantolu iha dalan ninin iha kapital Dili laran hodi asesu fila fali ba eskola.
“Durante ne’e ita fasilita ona labarik nain-10 ne’ebé faan de’it manutolu iha dalan ninin no laiha oportunidade ba edukasaun, hodi asesu ba eskola,” nia dehan.
Prezidente INDDICA Dinora Granadeiro dehan, tuir dadus asesmentu ne’ebé durante ne’e sira iha, totál labarik ne’ebé halo atividade fa’an manu-tolun ida dalan ninin hamutuk atus-tolu (300) maibe husi ne’e maiória eskola, no nain-10 mak durante ne’e la eskola.
Nia dehan, INDDICA servisu hamutuk ho Ministériu Edukasaun (ME) hodi entegra labarik na’in-10 ba ministério nune’e sira bele asesu ba eskola.
Nia hatete, labarik na’in-10 ne’e INDDICA mak kordena ho parte eskola sira hodi hatama sira ba eskola no dokumentu sira fasilita husi ministériu edukasaun.
“Sira na’in-10 ne’e na’in-2 la eskola liu no ita hatama iha ensinu báziku primeiru siklu primeiru anu no na’in-8 seluk tama iha terseiru anu,” Prezidente INDDICA Granadeiro informa iha Hotel Timor.
Nia dehan, kona-ba ekipamentu no farda eskola nian governu mak fasilita, sira ba eskola de’it, tanba identifika katak inan-aman husi labarik hirak ne’e vulnerável liu.
Alende ne’e nia informa, labarik na’in-10 ne’e husi Reziaun Administrativu Espesifiku Oe-cusse Ambenu (RAEOA) no husi Munisípiu Baucau.
Entretantu, Ministra ME Dulce de Jesus Soares dehan, labarik na’in-10 ne’ebé mak INDDICA integra ba ministériu dadaun ne’e sira hala’o hela estudu iha eskola.
“Dader sira ba eskola, lokraik mak sira ba faan sasan ajuda inan-aman ka ema ne’ebé sira hela ba,” nia informa.
Nia dehan, labarik sira halo atividade negósiu ne’e, tanba situasaun moris uma laran mak obriga sira tenke halo ida-ne’e.
“Esforsu governu nia mak ita tenke fasilita sira hotu asesu ba eskola,” nia informa.Nia hatete, governu ME no INDDICA nafatin servisu hamutuk hodi advokasia no monitorizasaun hodi buka tuir labarik sira ne’ebé mak husik eskola hodi faan sasan nune’e bele fasilita sira eskola fali.
