Patrimóniu estadu lima (5) inklui postu-polísia ida no karreta Estadu haat (4) hetan estragus durante asaun manifestante sira-nian durante loron rua nia laran foin lalais iha kapital Dili.
Porta-vos Komandu Polísia Nasionál Timor-Leste (PNTL), Superientédente João Belo dos Reis hatete, durante manifestasaun ne’ebé realiza husi Estudante Universitariu Timor-Leste (EUTL) polísia identifika patrimóniu estadu balun ne’ebe hetan estragus.
“Durante manifestasaun ita identifika patrimóniu estadu nian hamutuk lima (5) kompostu husi karreta 4 no postu-polísia ida mak hetan estragus,” nia salienta.
Nia hatete, kona-ba sasan sira ne’e, polísia identifika ona autór balun, maibé autór sira la’os estudante no dadaun ne’e sei iha prosesu investigasaun nia laran.
“Prosesu kontinua, tanba ida-ne’e krimé,” Porta-Vóz PNTL Superintendente Reis informa iha Kaikoli, Díli.
Nia hatete, situasaun hirak ne’e sidadaun hotu mós preokupa, tanba asaun krime ne’ebé mosu afetas husi demostrasaun ne’ebé halo. Tanba ne’e atu mantein asaun manifestasaun ne’e komandu bolu sira mai ko’alia hamutuk tenki iha konkordansia ruma, nune’e demostrasaun bele kontinua ho di’ak.
Iha fatin hanesan, Porta-Vóz EUTL Natalisio Nunes Martins hatete, EUTL forma ona, sira-nia ekipa seguransa atu bele kontrola membru sira atu mantein estabilidade iha asaun manifestasaun nia laran.
“Ami garante katak asaun kontinua ba oin bele la’o ho di’ak no garante paz no estabilidade durante manifestasaun iha loron tuir mai. Ami mós husu PNTL atu kontrola mós parte seluk ne’ebé mak hakarak kria instabilidade,” nia husu.
Nia hatete, sira-nia ezijensia ne’e sei kontinua ba asuntu sosial sira seluk.Alende ne’e durante manifestasaun ne’e polísia ida hetan kanek no estudante na’in haat (4) mós kanek.
