Estudante Universitáriu Timor-Leste (EUTL) kompostu husi estudante sira husi Universidade Nasionál Timor-Lorosa’e (UNTL), Universidade da Paz (UNPAZ), Universidade Oriental Timor-Lorosa’e (UNITAL), Universidade Díli (UNDL), no Institute Of Buseness (IOB), realiza manifestasaun iha resintu Parlamentu Nasionál nia oin hodi eziji deputadu sira kansela polítika sosa karreta Prado ba deputadu sira, no hatan ba preokupasaun sira seluk tan.
Portavós EUTL, Natalicio Neves dehan politíka sosa karreta Prado ba deputadu sira-ne’e EUTL la-aseita, tanba to’o ohin loron povu barak mak sei moris susar, balun lasesu ba eletrisidade, bee moos no estrada, no tanba ne’e tenke tau osan hodi hadia uluk mak povu nia moris.
“Ami la-aseita no ami realiza manifestasaun ida-ne’e hodi eziji ba Parlamentu Nasionál atu kansela sosa karreta prado ba deputadu sira na’in 65,” nia hatete.
Nia haktuir katak manifestasaun realiza ho asuntu haat (4) prinsipal, primeiru mak kona-ba ba sosa karreta Prado foun ba Deputadu sira, segundu mak konaba alterasaun lei manifestasaun, terseiru konaba ba kansela lei pensaun mensal vitalisia, no ikus mak aloka orsamentu ba iha setor produtivu sira inklui setor agrikultura iha baze.
“Asuntu haat (4) ne’e mak ami EUTL eziji ba Parlamentu Nasionál liuhusi asaun manifestasaun,” nia hatete.
Nia informa, katak loron primeiru asaun manifestasaun ne’ebé realiza nia rezultadu mak konsegue motiva Parlamentu Nasionál hodi kansela polítika sosa karreta Prado ba deputadu sira.
“Ba ohin ami nafatin hakikar kona-ba ajenda tolu seluk hanesan, alterasaun lei manifestasaun no reuniaun hasoru Governu ka Parlamentu Nasionál, lei pensaun mensal vitalisia ne’ebé fó benefisiu ba deputadu no nia jerasaun sira, no aloka orsamentu kada tinan tenke bo’ot ba setor produtivu no agrikultura iha baze, hodi hadia kondisaun povu ida ne’e nia moris,” Porta-Vóz EUTL Nunes hatete.
Nia salienta tan katak EUTL firme nafatin hodi eziji ba Parlamentu Nasionál hodi buka solusaun ba ajenda tolu refere.
Entretantu, Deputadu Patrocínio Fernandes dehan, informa katak Bankada CNRT, PD, no KHUNTO deside ona kansela sosa karreta foun.
“Ita bankada tolu ne’e halo analiza ba polemika sosa karreta foun ne’e katak, própriu deputadu balun direta no indireta, explora situasaun ne’e nu’udar aproveitamentu ba sira-nia interese partidária nian,” nia hatete.
Nia haktuir katak, husi analiza ne’e bankada tolu refere deside ona hodi kansela sosa karreta foun ba Deputadu sira. Aleinde ne’e sira husu ba Parlamentu Nasionál atu kansela prosesu tomak kona-ba akizisaun sosa karreta.
Enkuantu husi asaun manifestasaun ne’e realiza iha resintu Parlamentu Nasionál oin no rezulta karreta Deputadu nian rua rahun, karreta husi delegasaun Uniaun Europeia ida mós vidru rauhin, no karreta polisia nian ida rahun. Estudante balun mós hetan kanek maibe sirkunstansias sei investiga hela.
