Autoridade lokal husu ba Komandu Polísia Nasionál Timor-Leste (PNTL) atu valoriza servisu Konsellu Polísiamentu Komunitariu (KPK).
Xefe Suku Kulu-Hun, Deus Dado Martins, hateten durante ne’e KPK hala’o sira-nia knaar hodi fó apoiu ba autoridade lokal sira liuhusi seguransa maximu ba komunidade nune’e mós kria paz no estabilidade iha komunidade nia le’et, maibé sira presiza apoiu, liuliu finanseiru, hodi sustenta nesesidade família nian.
“KPK hirak ne’e iha família. Sira presiza finanseiru ruma atu bele sustenta sira-nia família, ho nune’e husu ba Instituisaun Polísia Nasionál Timor-Leste atu valoriza sira-nia servisu liuhusi finanseiru. Labele voluntáriu de’it, ” Xefe Suku Martins dehan iha Esquadra Cristo-Rei, Díli.
Nia hatutan, kazu konfrontu ne’ebé sempre akontese iha Kulun-Hun ne’e laiha partisipasaun husi KPK, tanba bainhira autoridade lokal sira bolu KPK sira atu atua ho sira labele atua ho razaun, sira presiza halo buat seluk ne’ebé bele hetan osan hodi sustenta família.
“Ita tenki konsidera sira atu nune’e sira bele iha vontade servisu ne’ebé di’ak hodi kontribui ba kria paz no estabilidade iha rai laran,” nia dehan tan.
Iha fatin hanesan Komandante Polísia Munisípiu Díli, Superintendente Xefe Orlando Gomes hateten, rekomendasaun sira-ne’e komandu konsidera no sei hato’o ba Komandu Jerál PNTL liuhusi relatóriu hodi nune’e bele konsidera.
“Loos duni katak buat hotu presiza osan, maibé ha’u labele foti desizaun, tanba ida ne’e desizaun komandu nian,” nia informa.
Nia dehan, husu ba KPK sira hala’o lai idaidak nia knaar tuir juramentu ne’ebé halo ona hodi halo identifikasaun ba problema sira iha suku laran no apoiu polísia hodi prevensaun ba krime iha sosiedade.
“Imi-nia kontribuisaun importante tebes hodi kria paz no estabilidade iha kada suku,” Komandante Munisípiu Díli Superintendente Xefe Gomes dehan.Nia hatete, kapitál Díli presiza situasaun hakmatek ambiente ne’ebé seguru nune’e dezenvolvimentu ne’e bele la’o liuhusi ema bele mai investe no bele kria kampu servisu ba joven sira.
