Komandante Unidade Patrullamentu Fronteira (UPF) Superintendente Euclides Belo dehan, ultrapasa fronteira terrestre entre Timor-Leste no Indonézia uza dalan ilegál, ne’e perigu ba ema nia vida, tanba ne’e husu ba sidadaun hotu tenke liuhusi postu entrada-saida fronteira sira.
Nia dehan, dalan ilegál hahú husi munisípiu Bobonaro, Covalima, Oe-cusse ne’e bele reprezenta risku tebes ba ema nia vida.
“Dalan ilegál ne’e perigozu ba ema nia vida, tanba ne’e husu ba sidadaun sira evita liuhusi dalan ilegál no tenke utiliza postu entrada sira,” Komandante UPF Superintendente Belo dehan.
Superintendente Belo rekorda, iha tinan hirak liu-ba akontese ona sidadaun ida lakon vida, tanba tama ba nasaun Indonézia liuhusi dalan ilegál mak hetan insidente no lakon vida.
Nia hatete, sidadaun sira bele ultrapasa postu entrada Batugade, Mota-Masin, Oesilo no Sakato nune’e bele hakat ba Indonézia ho dalan legál.
“Ami husu ba sidadaun sira atu kumpri pontu entrada husi Batugade, Mota Masin, Sakato no Oesilo se bainhira sidadaun sira la kumpri mak ami sei foti asaun rigurozu ba imi,” nia informa.
Nia informa UPF garante nafatin seguransa iha liña fronteira bainhira sidadaun ne’ebé mak kumpri regras ou tama ilegál, UPF foti medidas tuir prosedimentu legais ne’ebé iha.
Enkuantu nia dehan, foin lalais ne’e Unidade Patrullamentu Fronteira (UPF) konsege halo kapturasaun ba sidadaun hamutuk 91 ne’ebé tenta liuhusi dalan ilegál ba Indonézia.
Entretantu Diretór Ezekutivu Fundasaun Mahein (FM) Nelson Belo dehan, atividade movimentu ilegál ne’e la’ós buat foin akontese, maibé kada tinan sempre akontese, tanba ne’e tenke reforsa kontrolu iha fronteira.
“Reforsa kontrolu liuhsi aumenta pesoál tanba ita haree Unidade Patrullamentu Fronteira (UPF) ne’e menus liu hodi koloka ba postu sira,” nia informa.Nia dehan, sidadaun hirak ne’ebé ultrapasa liña fronteira ne’e maioria atividade negósiu, tanba komunidade sira iha munisipíu fronteriza ne’e maiória asesu ba nesesidade báziku husi nasaun viziñu Indonésia.
