Polísia Nasionál Timor-Leste (PNTL) liuhusi Diresaun Investigasaun Kriminál Nasionál (DIKN) kompleta ona prosesu invetigasaun ba kompaña ida ne’ebé halo rekrutamentu ilegál ba Timoroan sira hodi ba servisu iha nasaun estranjeiru Brunei Darusalam.
Diretór DIKN Superintendente João Belo dos Reis dehan, kompaña ne’e identifika liuhusi servisu informasaun polísia nian, loos duni katak sira mak durante ne’e mak rekruta Timoroan na’in 16 no bosok dehan ba servsiu, maibé ikus mai sai vitíma ba tráfiku umanu.
“Ita identfika ona no dadaun ne’e ita halo ona prosesu investigasaun no submete ba Ministériu Públiku hodi kuntinua prosesu ba tribunál nune’e bele responsabilidade ba aktu krime ne’ebé sira halo,” nia informa.
Nia dehan, kompaña ne’ebe investiga ona Timoroan maibé ligasaun ho ema iha rai liur hodi bosok Timoroan sira ba servisu iha rai liur maibé ba sai fali vítima ba tráfiku umanu.
“Ida-ne’e kazu Transnasional Crime, tanba ne’e ita sei la husik livre ajensia sira ne’ebé fasilita Timoroan sira sai vítima ba trafiku umanu,” Diretór DIKN Superintendente Reis informa.
Nia informa, ajénsia sira ne’ebé fasilita Timoroan sira sai ba rai-liur laiha koñesimentu husi governu no rekruta ilegál de’it.
Alende ne’e nia dehan, dadaun ne’e vitíma na’in 16 refere seidauk fila mai Timor-Leste (TL) no sei iha Brunei Darusalam no sei hein prosesu transportasaun mai TL.
Entretantu, Diretór Ezekutivu Fundasaun Mahein (FM) Nelson Belo dehan, dadaun ne’e Timoroan sira sai risku tebes ba kazu tráfiku umanu ne’ebé mak realiza husi kompaña ilegál sira.
“Tenke halo prosesu ne’ebé seriu ba kompaña sira ne’ebé mak realiza atividade ilegál hirak ne’e nune’e bele hado’ok Timoroan sira husi tráfiku umanu,” nia informa.
Nia hatete, FM observa servisu informasaun presiza reforsa tan liuhusi husi ekipamentu no rekursu umanu tanba kazu tráfiku umanu ne’e amiasa tebes ba ita nia joven sira-nia futuru tan de’it hakarak família nia moris di’ak.Alende ne’e nia dehan, atu halo prevensaun ba krime tráfiku umanu ne’e presiza servisu integradu kada ministériu halo nia servisu la’ós polísia nian servisu de’it.
