Bazeia ba lei númeru 9/2025 fó dalan ba Komisaun Funsaun Públika (KFP) hodi halo reforma obrigatóriu ba funsionáriu públiku ne’ebé tama ona idade reforma.
Prezidente KFP, Agostinho Letêncio de Deus dehan, reforma obrigatóriu ne’e sei akontese iha tinan oin 2026 hodi fó oportunidade ba foinsa’e sira ne’ebé idade produtivu sai funsionáriu públiku.
“Husi dekretu lei númeru 9/2025 ne’e fó dalan ba KFP halo reforma obrigatóriu ba funsionáriu públiku sira ne’ebé tama ona idade reforma, ” nia salieta.
Nia hatete, iha estatutu KFP nian depois hetan autorizasaun husi Parlamentu Nasionál ho lei númeru 7/2024 no halo alterasaun estatu KFP ho dekretu lei númeru 9/2025 fó dalan ba funsionáriu ne’e ho idade 65 tenke reforma.
Nia dehan, tuir dadus ne’ebé iha, funsionáriu públiku tama reforma obrigatóriu iha tinan 2026 hamutuk na’in 4.752, sira-ne’e idade hahú husi 65 to’o 89.
“Ita-nia funsionáriu públiku hirak ne’ebé tama ona ba idade reforma ne’e sira-nia pensaun automatikamente tama ona iha seguransa sosial,” Prezidente KFP Letêncio dehan.
Nia hatete, reforma obrigatóriu ne’e dalan di’ak para bele prepara fali joven sira hodi bele funsionáriu públiku.
Iha parte seluk Deputada Lídia Norberta dos Santos Martins hatete, funsionáriu públiku sira ne’ebé idade reforma dalan di’ak liu tenke submete dokumentu ba reforma.
“Tenke reforma nune’e ita bele utiliza foin-sa’e sira ne’ebé mak matenek iha área oin-oin hodi halo dezenvolvimentu ba ita-nia rain,” nia hatete.
Nia dehan, foin-sa’e sira potensial iha área oin-oin ne’ebé hala’o estudu ba, tanba ne’e estadu no governu tenke utiliza nune’e sira labele ba servisu iha rai liur.
“Ita tenke kaer metin ita-nia joven sira utiliza matenek ne’ebé sira iha hodi sai hanesan mákina estadu ne’ebé inovativu hodi kontribui ba dezenvolvimentu,” Deputadu Norberta salienta.Nia dehan, Parlamentu Nasionál apoiu implementasaun reforma obrigatóriu ba funsionáriu públiku idade avansadu.
