Governu Brazil liuhusi Embaixada iha Timor-Leste apoiu Ministériu Edukasaun (ME) hodi halo dezenvolvimentu ba Eskola Sekundaria Téknika Vokasionál (ESTV) no fasilita formasaun iha área kontabilidade, programasaun, konstrusaun sivil, no área estratéjika sira seluk.
Sekretáriu ba Sekretariadu Estadu Ensinu Sekundáriu Jerál no Tékniku Vokasionál (ESG-ESTV) Domingos Lopes Lemos dehan, formasaun refere espesífiku ba profesór sira iha ESTV nune’e bele dezenvolve sira-nia kapasidade iha área tékniku nian hodi forma estudante sira asesu ba merkadu servisu.
“Dadaun ne’e Governu Brazil apoiu ME hodi dezenvolve ESTV liuhusi formasaun profesór sira,” nia hatete.
Nia dehan, formasaun ne’e etapa dalahuluk ba professor sira nian atus-ida-resin-haat (104) mak partisipa, tanba ne’e hanesan programa pilotu depois sei kontinua tan ba professor sira seluk ne’ebé hanorin iha ESTV.
“Kooperasaun ne’e atu ita hametin jestaun téknika no administrativa, hodi hadi’ak prosesu edukasaun no habelar oportunidade ba peskiza profisionál ba estudante sira,” Sekretáriu ba SE ESG-ESTV Lopes informa.
Enkuantu nia dehan, kooperasaun ne’e sustentável entre Timor-Leste no Brazil, ho objetivu atu konsolida benefísiu ba professor sira, estudante no komunidade iha tinan oin mai.
Iha fatin hanesan, Conselheira Encarregada de Negócios husi Embaixada Brazil iha Timor-Leste, Rita de Cássia Lott Marques hateten, programa pilotu ne’e foka liu ba área ESTV iha territóriu tomak, nu’udar kontinuidade ba kooperasaun entre nasaun rua.
“Nasaun rua ne’e bele hametin koordenasaun forte atu haruka Timor-Leste ba futuru di’ak liu, maske iha dezafiu iha programa pilotu. Brazil sei kontínua sai parseiru importante ba Timor-Leste, liuliu iha área edukasaun, hodi bele fó kontribuisaun ba formasaun profesór sira no dezenvolvimentu eskola tékniku vokasionál,” nia dehan.
Nia informa, apoiu ne’e atu dezenvolve di’ak liután kualidade edukasaun tékniku vokasionál, hodi prepara rekursu umanu hodi responde ba nesesidade merkadu traballu iha Timor-Leste.
“Ita prontu apoiu ME hodi halo dezenvolvimentu iha area edukasaun primeiru ita foka uluk ba eskola tékniku vokasionál sira depois ba eskola sira seluk tuir MoU ne’ebé asina ona,” nia informa.Enkuantu totál ESTV iha Timor-Leste hamutuk 36 kompostu husi Agríkola, Hotelaria, Mekánika, Engeñaria, Industria no seluk tan.
