Prezidénsia Repúblika liuhusi Diresaun Servisu Sosiedade Sivil no Asuntu Sosial (DSSAS) konstrui ona hela fatin ba oan-kiak nain neen (6) iha Munisípiu Manufahi Postu Administrativu Same, Suku Dausai, Aldeia Riatu.
Koordenadora DSSAS, Teresa do Santos Ximenes hatete, apoiu hirak refere inisiativa husi Prezidente Repúblika nian ligadu no situasaun moris oan-kiak nain neen (6), tanba sira nian inan mate no aman iha dadur, no husik hela sira hela de’it iha uma piku ida ne’ebé kondisaun aat tebes, no sira-nia avo no avo sira mak tau matan ba sira-nia nesesidade loron-loron.
“Prezidente Repúblika konstrui hela fatin dignu ba oan kiak nain 6 ne’e ho medida 8×7 inklui haris fatin, dapur no kios hodi sustenta sira-nia moris,” nia hatete.
Nia hatete, prosesu konstrusaun ba hela fatin ne’e durasaun fulan tolu (3) nia laran sira bele utiliza ona uma dignu ne’e.
“Uma ba oan-kiak ne’e la’ós ita foin halo, maibé halo ona iha munisipíu hanesan Aileu, Liquiçá, Ermera no Manufahi. Ba oin ita sei identifika ba oan-kiak no kbi’it laek sira nune’e bele konstrui hela fatin ba sira,” nia salienta.
Nia hatete, durante ne’e Prezidente Horta konstrui ona uma ba oan-kiak hamutuk na’in 15 iha munisípiu refere.
Entretantu, benefisiária Alicia Barros, agradese tebes ba Prezidente Repúblika Horta, tanba bele apoiu uma ba nia ho alin nain-lima (5) hodi hela.
“Durante ne’e ami hela de’it ho avo sira, dalaruma ami han dalaruma mós ami lahan, tanba hahan laiha,” nia hatete.
Nia hatete, lori nia alin na’in 5 nia naran hato’o agradesementu boot ba Prezidente Repúblika José Ramos Horta, tanba bele fó nia domin hodi harii uma dignu refere.
“Maske ami moris iha susar laran, maibé ba edukasaun ami asesu hela, tanba ami sei eskola gratuitu hela no ami sei kontinua eskola nafatin,” nia dehan.Aleinde ne’e nia hato’o agradese mós ba Xefe Suku no Administrador Postu Administrativu Same, tanba durante ne’e sempre apoiu sira kona-ba hahan.
