Tuir dekretu lei Númeru 16/2009 kona-ba uza arma Polícia Nacional Timor-Leste (PNTL) nian iha razaun fundamentál rua hanesan, ida mak hodi asegura ema seluk nia vida iha perigu nian laran no sekuk wainhira atu asegura polísia nia vida rasik bainhira iha perigu.
Diretór Diresaun Investigasaun Kriminál Nasionál (DIKN), Superintendente Xefe João Belo dos Reis dehan, atuasaun lejitimu defesa polísia bele halo bainhira iha akontesimentu ne’ebé fó risku ba pesoál polísia ida nia vida no ema seluk iha fatin akontesimentu. Maibé nia dehan, lasignifika katak iha atuasaun hotu tenke uza forsa.
“Lei uza forsa Polísia nia fó dalan ba membru sira uza forsa iha terenu bainhira halo atuasaun sira, maibé tenke bazeia ba razaun fundamentál rua, salva nia vida iha risku no ema seluk nia vida iha risku,” nia informa.
Nia hatete, membru sira ne’ebé utiliza arma ne’e treinadu no komprende didi’ak kona-ba lei uza forsa nian.
“Ita-nia membru sira mós molok utiliza arma sira iha formasaun ba uzu arma, arma sira uza de’it iha oras servisu, fora husi ne’e la autoriza,” nia informa.
Nia dehan, proibidu tebes ba polísia sira utiliza arma fora husi oras servisu. Bainhira atu fila uma, arma sira-ne’e tenke rai hamutuk iha fatin seguru iha kuartel, unidade ka eskuadra mak bele fila uma.
Entretantu Diretór Ezekutivu Fundasaun Mahein Nelson Belo dehan, membru polísia sira bele uz arma durante oras servisu nian iha atuasaun sira, maibé tenke tuir lei orgánika PNTL nian la’os uza tuir gostu ka odi privadu sira.
“Bele uza forsa hodi salva sira-nia an no ema seluk ne’ebé besik iha sira banhira ameasa ba sira vida, la’os kaer ona kilat ne’e tiru tun, tiru sae, ida-ne’e ita lakonkorda,” nia dehan.
Nia husu mós ba komandu jerál PNTL tenke kontrolu didi’ak nia membru sira iha situasaun uza forsa nian nune’e labele akontese tan situasaun hirak ne’ebé liu ona kontinua fali.
“Komandu tenke fó sansaun disipinár ba membru sira ne’ebé ulun to’os hodi utiliza arma fora husi oras servisu no lori arma ba uma. Ida-ne’e risku tebes,” FM Belo informa.Tanba ne’e nia dehan, ba autoridade seguransa labele utiliza arma fora husi oras servisu, bainhira fora husi oras servisu arma sira tenke rai hela iha armajen armas ni’an.
