Fundu Dezenvolvimentu Kapitál Umanu (FDCH) dadaun ne’e haruka tan Timoroan hamutuk na’in sanulu-resin-lima (15) ba estuda iha Akademia Politékniku Engeñaria Mekánika no Industria Surakarta Indonézia iha iha nivel estudu Diploma IV.
“Ita haruka tanba ita presiza tebes espesiálista husi área Manufaktura, Mekánika, Engeñaria no Industria. Ba area hirak ne’e tanba iha Timor-Leste area hirak ne’e menus liu,” Diretór Ezekutivu FDCH Júlio Apáricio dehan.
Nia dehan, bolseiru hirak ne’e admitidu husi teste ne’ebé mak realiza iha fulan Dezembru tinan 2024 nian.
Nia husu ba estudante hirak refere bele aproveita di’ak iha estudu nune’e fila mai Timor-Leste bele kontribui ba dezenvolvimentu nasionál liuhusi área ne’ebé sira estuda ba.
Enkuantu totál bolseiru ne’ebé ba hala’o estudu iha rai liur, durante tinan 2024 hamutuk na’in 4.830 no totál orsamentu husi FDCH $13.956.821.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, estudante bolseiru sira ne’ebé governu haruka ba eskola iha estranjeiru ne’e fila mai governu tenke utiliza sira, la’ós lakon osan boot fila mai abandona.
“Tenke tau sira iha área ne’ebé sira estuda ba nune’e bele utiliza matenek ne’ebé sira iha hodi dezenvolve Timor-Leste,” nia hatete.Nia dehan, agradese mós ba sira ne’ebé remata estudu fila mai kria rasik kampu-servisu nune’e mós bele fó servisu ba joven sira seluk.
