Ministériu Edukasaun (ME) kompleta distribuisaun karteira eskolár inklui kadeira 840 no meza 606 ba eskola sira iha munisípiu neen (6) ne’ebé mak identifika ona.
“Ita identifika eskola hamutuk 16 husi munisipíu 6 mak falta kadeira no meza eskolár,” ekretáriu ba Sekretariadu Estadu Ensinu Sekundáriu Jerál no Tékniku Vokasionál (SEESJTV) Domingos Lopes Lemos dehan.
Nia hatete, eskola 16 ne’e kompostu husi Munisípiu Liquiçá, eskola bázika filiál (EBF) Bogoro hetan, kadeira 60 no meza 60, Díli, Eskola Pre-Eskolár (EPE) Francisco Xavier Dare, kadeira 40 no meza 16, Viqueque ESG 4 de Setembro kadeira 90 no meza 90, no Lautém ESG No. 1 Lautem, meza 120 ho kadeira 120.
Ainaro distribui ba iha eskola 10 mak hanesan, (EPE) Bermoli, meza 16 no kadeira 40, ESTV Gil da Costa “Oan Soru” kadeira 30 no meza 30, EPE Goulora, Hatubulico, meza 16 no kadeira 40, EPE Heriba, meza 16 no kadeira 40, EPE Mane Lobas, meza 16 no kadeira 40.
EPE Maubisse Villa, meza 16 no kadeira 40, EPE Nunu-Moge, meza 16 no kadeira 40, Eskola Bázika Filiál Queo-Rema meza 16 no kadeira 40, ESG Tas-Topa, meza 60 no kadeira 60 ba Munisípiu Baucau iha eskola ida ESG Aubaca, meza 120 no kadeira 120,”.
SEESJTV Lemos informa tan katak, eskola hirak refere ne’ebé mak hetan apoiu karteira eskolár ne’e identifikadu husi ekipa, Diresaun Nasionál Patrimóniu no Lojístika (DNPL) nian no hatudu katak sira presiza duni kadeira no meza ba estudante.
Nia hatete, ME foti kedas asaun hodi halo distribuisaun urjentemente kadeira no meza ba eskola hirak ne’e, tanba durante ne’e estudante balun tur de’it iha rai hodi partisipa prosesu aprendizajen, no ba oin sei kontinua identifika ba eskola sira ne’ebé mak enfrenta problema menus kadeira no meza nune’e bele responde.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, problema menus kadeira no meza ne’e sempre akontese kada tinan liga no númeru estudante rejistu iha eskola.
“Ita haree maioria eskola enfrenta problema ida-ne’e, maibé ME mós esforsu makaas hodi rezolve maske etapa ba etapa,” nia hatete.Nia hatete, ME mós fokus loos de’it ba iha ne’e, maibe tenke haree mós ba iha infraestrutura eskolár hanesan bee mós, sintina, iha eskola sira ne’ebé mak konstrusaun aat ona.
