Estudante sira husu Ministériu Edukasaun (ME) tenke promove modalidade Atletizmu no Jinástika iha atividade desportu eskolár nian.
Estudante Felismina de Oliveira Cabral dehan, desportu ne’e importante hodi dezenvolve kapasidade estudante nian nune’e mós prepara sira hodi bele ba kompete iha nasionál no internasionál.
Nia dehan, desportu sira seluk hanesan futeból no futsal’, voliból, basquetból, realiza iha eskola sira iha, maibé modalidade seluk, inklui atletizmu no jinástika, laiha.
“Ami husu atu (ME) bele promove tan modalidade atletizmu no jinástika iha desportu eskolár kada eskola,” nia hatete.
Nia dehan, liga ba kompetisaun ne’ebé mak organiza husi Federasaun Atletizmu Timor-Leste, kona-ba atletismu no jinástika ne’ebé envolve husi estudante sira-ne’e maioria lahatene kona-ba regras no maneira sira, maibé partisipa de’it.
“Ami ba kompete de’it, tanba lori eskola nia naran, maibé finalidade ami mós sai vensedór iha kompetisaun refere,” esudante Cabral husi eskola ESG 4 de Setembro dehan.
Nia dehan, husu ba ME ba oin tenke tau modalidade rua-ne’e iha atividade estrakurrikulár nian hodi prepara estudante sira-nia talentu.
Entretantu, Diretór Jerál Ensinu Sekundáriu (DGES) Deolindo da Cruz, hatete, desportu importante iha edukasaun, tanba bele muda mentatilidade, fó konfiansa no motiva estudante sira atu hetan susesu iha futuru.
Nia dehan, modalidade atletizmu no jinástika iha materia desportu iha maibé teori de’it pratika laiha, ba oin ME sei haree hodi tau prioridade ba iha prátika. Nune’e promove iha eskola dezenvolve talentu estudante, hasa’e espíritu desportu, isin saudavél no matenek.
“Ba oin ME sei dezenvolve liu tan iha eskola hodi prepara estudante sira ba atividade desportu nasionál to’o internasionál sira,” nia salienta.
Nia dehan, ME ho Ministériu Juventude Desportu, Arte no Kultura (MJDAC) no Federasaun Atletizmu Timor-Leste promove modalidade rua-ne’e liuhusi realiza kompetisaun ba eskola Ensinu Báziku, Ensinu sekundáriu Jéral no Téknika Vokasional iha Díli, depois sei promove to’o eskola sira iha munisípiu.”Aleinde ita promove liuhusi kompetisaun, ita mós sei promove iha kurríkulu liu-liu matéria desportu nian iha estrakurrikulár atu nune’e estudante sira bele aprende nune’e mós hodi prepara sira-nia aan hodi partisipa iha kompetisaun nasionál no internasionál sira,” nia informa.
