Governu liuhusi Ministériu Juventude Desportu Arte no Kultura (MJDAC) dadaun ne’e espande modalidade futeból to’o munisípiu sira hodi promove joven sira-nia talentu iha mundu desportivu.
Ministru ba MJDAC Nelio Izaac Sarmento dehan, governu hakarak lori futeból besik liu ba komunidade sira, hodi dezenvolve telentu joven sira-nian.
Nia hatete, lori futeból ba munisípiu sira-ne’e sai nu’udar polítika ne’ebé governu iha hodi prepara joven sira iha mundu futeból hahú husi baze to’o nasionál.
“Ita kria polítika ida ne’e hodi fó oportunidade ba joven sira iha área rural hodi dezenvolve sira-nia talentu, tanba durante ne’e laiha oportunidade ba sira,” nia informa.
Nia informa, joven sira iha área rural ne’e barak mak abilidade di’ak tebes iha futeból, maibé laiha dalan ba sira hodi promove.
“Ita dezenvolve modalidade futeból ne’e ba iha munisípiu sira hotu hodi prepara foin-sa’e sira hodi kompete iha nasionál nune’e mós internasionál,” nia Ministru MJDAC Izaac informa.
Alende ne’e nia hatete, maske dadaun ne’e infraestrutura desportivu nian iha munisípiu sira seidauk di’ak maibé governu sei esforsu hod bele rezolve.
Entretantu Prezidente Autoridade Munisípiu Manatuto Luis Fernandes dehan, durante ne’e atividade futeból iha Manatuto la realiza.
“Iha Manatuto ami iha joven barak mak iha abilidade di’ak tebes ba futeból, maibé laiha dalan ba sira hodi kompete iha nasionál nune’e mós internasionál,” nia hatete.
Nia dehan, espera katak husi polítika governu nia lori Futeból ba munisípiu ne’e hodi fasilita joven talentu iha futeból bele hatudu abilidade ne’ebé mak durante ne’e iha.
“Polítika ne’e bele hamoris futeból iha Manatuto no motiva joven sira iha munisipíu to’o postu administrativu no suku sira,” nia informa.Nia hatete, ba oin sei utiliza estádiu Munisípiu Manatuto ho di’ak kona-ba futeból.
