Hahú fulan Janeiru to’o Maiu 2025, Ministériu Edukasaun (ME) rejistu eskola lima (5) husi Munisipíu Ermera no Viqueque mak afetadu ba dezastre naturais.
Diretór Diresaun Nasionál Edukasaun Inkluzivu no Asaun Sosiál Eskolár (DNEIASE) iha ME, Fernando Soares dehan, eskola 5 ne’e husi Munisípiu Ermera tolu (3) mak Eskola Báziku Central (EBC), Baboleten, EBC Ponilala, EBC 20 de Agosto, no husi Munisípiu Viqueque eskola rua (2), EBC Bimali, no Eskola Pre-Eskolár Bimali.
“Eskola hirak ne’e ME halo ona apoiu emerjénsia hodi bele hadia fila, nune’e bele utiliza provizóriu lai hodi hein konstrusaun foun.
Nia hatete, eskola sira-ne’e afetadu ba dezastre naturais ho tipu mota-sobu, ai-hanehan, no anin sobu hodi estraga infraestrutura eskolár nian.
“Eskola hirak ne’e ita apoiu matérial emerjénsia la hanesan, tanba ME apoiu tuir estragus ne’ebé mak iha,” Diretór DNEIASE Soares informa.
Entretantu Koordenadór Rede Edukasaun Timor-Leste Coalition for Education (TLCE) Jose Monteiro dehan, konstrusaun ba eskola sira ne’ebé mak afetadu ba dezastre naturais ne’e tenke lalais.
“La’ós husik estudante sira kleur iha infraestrutura provizóriu ne’e ita lahatene dalaruma mós konstrusaun provizóriu ne’e lori perigu ba estudante no profesór sira-nia vida,” nia salienta.Nia hatete, husu ME tenke aselera lalais konstrusaun foun ba eskola sira ne’ebé mak afetadu ba dezastre naturais hodi prepara kondisaun seguru ba estudante sira.
