Ministra ba Ministériu Edukasaun (ME) Dulce de Jesus Soares hateten, inspetór eskolár sira tenke hatene didi’ak kona-ba literásia no númerasia bázika atu fasilita sira hodi halo inspesaun ba asuntu administrativu, aprendisajen no finanseiru eskola nian.
“Atu hasa’e koñesimentu kona-ba asuntu ne’e ministériu realiza formasaun kona-ba literasia no numerasia ba inspetór eskolár hamutuk lima-nolu (50) husi territóriu laran hodi fasilita servisu,” dehan ME Soares.
Nia hateten, inspetór eskolár sira halo inspesaun ba eskola sira hodi haree asuntu tolu (3) inklui administrativu, prosesu aprendizajen no finanseiru eskola nian.
“Husu ba inspetór eskolár sira ne’ebé partisipa iha formasaun ne’e tenke hatene didi’ak kona-ba literásia no numerasia,” nia husu.
Nia salienta, inspetór eskolár hahú husi pre-eskolár, ensinu báziku, sekundáriu jerál no vokasionál sira iha territóriu laran tomak tenke prepara idaidak nia abilidade hodi bele fó rezultadu di’ak ba servisu.
“Literásia no númerasia ne’e sai baze fundamentál ba tuir prioridade governu nian katak estudante sira iha nivel ensinu báziku ne’e tenke iha literásia no númerasia ne’ebé di’ak,” ME Soares dehan.
Nia hatete, atu atinje ida ne’e la’o ho di’ak presiza inspetór eskolár sira komprende kona-ba oinsá mak prosesu aprendizajen, no numerasia.
Alende ne’e nia dehan, inspetór eskolár sira mós motivu professór sira oinsá bele hanorin estudante sira ho di’ak liután.
Entretantu Inspetora Pre-Eskolár Munisípiu Liquiça, Lucia Oliveira Martins dehan, formasaun refere importante tebes ba nian, tanba bainhira molok sira tun ba terenu sira tenke prepara uluk kapasidade.
“Ami mak tenke hatene uluk bainhira ami ba profesora, sira enfreta problema ruma ami tenke apoiu sira,” nia informa.Nia hatete, formasaun labele para de’it iha ne’e, maibé kada tinan tenke realiza nafatin atu bele hadia di’ak liu-tán koñesimentu alende inspetór eskolár sira nune’e mós profesór sira.
