Governu liuhusi Ministériu Interiór (MI) prepara Unidade Polísia Marítima (UPM) hodi responde ameasa sira iha área kosteria Timor-Leste nian.
Ministru ba Ministériu Interiór Francisco da Costa Guterres hatete, governu prepara UPM liuhusi investimentu, primeiru rekursu umanu, kompleta lantas sira hodi halo kontrolu área kosteria Timor-Leste nian, no infraestrutura, ekipamentu.
Nia dehan, ameasa iha tasi ne’e kompleksu tebes dalaruma responde, dalaruma mós sira lakonsegue responde, tanba sei iha problema iha área hirak ne’e.
“Dadaun ne’e ita prepara sira liuhusi investimentu ba rekursu umanus, meiu sira, infraestrutura no ekipamentu salvamentu pesoál hodi fasilita sira-nia iha servisu kontrolu hodi responde ba krime sira ne’ebé atravesa husi tasi,” Ministru MI Guterres informa iha Kuartel UPM Bidau Lecidere, Díli.
Nia hatete, ameasa sira iha tasi liu-liu krime organizadu sira, tráfiku droga, tráfiku umanu peska ilegal sira ne’ebé mak sempre akontese iha zona jurídiku Timor-Leste nian.
“Ita mós tenke harii portu ida ba UPM atu nune’e sira bele atraka ró sira, nune’e akontese ameasa ruma sira tenke prepara an ba hodi responde,” nia informa.
Alende ne’e nia dehan, Ministériu Interior hamutuk ho Ministériu Defeza atu sosa ró ida nune’e bele utiliza husi UPM no Forsa Navál hodi kontrola tasi.
“Dadaun ne’e ita hahú tau kondisaun báziku no tuir mai ita investe hodi prepara sira sai hanesan forsa UPM ne’ebé preparadu hodi hasoru situasaun sira,” nia informa.
Iha fatin hanesan, Komandante UPM Superintendente Xefe Eugenio Pereira hatete, durante UPM hasoru problema iha patrollamentu, tanba meiu laiha.
“Ita iha de’it ró ki’ik lima (5), maibé kondisaun ladun di’ak no ita utiliza iha de’it ninin, sira latama to’o laran,” nia hatete.
Nia hatete, kona-ba rekursu humanu UPM sufisiente hodi halo servisu intervensaun no prevensaun kazu krime iha tasi.
“Durante ne’e kazu krime ne’ebé ami rejistu hamutuk 45 maioria merkadu ilegál de’it,” Komandante UPM Superintendente Xefe Pereira Informa.Nia hatete, espera katak ba oin governu sei rezolve problema ne’ebé sira iha nune’e bele servisu di’ak liután iha futuru.
