Programa Nasionál Dezenvolvimentu Suku (PDNS) konstrui ona edifísiu eskolár hamutuk ho sala de aula tolu ba Eskola Sekundaria Géral (ESG) Fernando Lasama de Araújo iha Suku Cassa, Munisipiu Ainaro.
Diretór Dezenvolvimentu Lokál Virgílio da Costa dehan, programa PNDS ne’e atu hadi’ak tan ka dezenvolve suku sira foka liu ba bee mós, estrada, infraestrutura saúde nian, eskola nian, no seluk tan.
“Infraestrutura eskolár dadaun ne’e ita konstrui ona edifísiu eskolár ida ba ESG Fernando Lasama de Araújo Cassa Ainaro ho sala de aula tolu hodi fasilita estudante sira partisipa iha prosesu aprendizajen ho dignu,” nia hatete.
Nia hatete, orsamentu ne’ebé gasta hodi konstrui eskola refere hamutuk $41,000.
Alende ne’e nia dehan, durante ne’e PNDS liuhusi planu ne’ebé Konsellu Suku sira aprezenta, halo ona reabilitasaun ba sede suku haat (4) no postu saúde rua (2) iha Município Ainaro.
Entretantu, Sekretáriu Estadu Ensinu Sekundáriu Jerál no Tékniku Vokasionál Domingos Lopes Lemos dehan, edifísiu refere bele benefisia di’ak liután estudante sira iha Suku Cassa hodi asesu ba eskola ho di’ak.
“Husu ba estudante labele hakerek iha paredi eskola nian, obra ne’ebé mak entrega ona ba eskola no profesór sira-ne’e presiza kuidadu ho ambiente ne’ebé mós nune’e bele utiliza ba tempu naruk,” nia informa.
Nia hatete, estudante sira ba iha eskola atu aprende no profesór sira mak sai hanesan espellu ba estudante no inan-aman sira hatudu karaktér ne’ebé di’ak hanesan manorin-na’in.
“Ministériu Edukasaun agradese ba PDNS, tanba bele apoiu ministériu hodi konstrui edifísiu foun ho sala de aula 3 ba ESG Fernando Lasama de Araújo,” nia informa.
Iha parte seluk Responsável eskola Sekundáriu Jerál Paralelo Ainaro Cassa, Alexandre Bianco, dehan, hanesan Suku Cassa oan kontenti tebes, tanba bele hetan edifísiu foun ho fasilidade adekuadu husi PNDS atu fasilita estudante sira eskola di’ak no dignu.
“Fatin ida ne’e fó espasu di’ak ona ba profesór atu bele hanorin ho vontade di’ak, estudante mós aprende ho vontade di’ak,” nia salienta.Enkuantu totál estudante iha ESG Fernando Lasama de Araújo Cassa hamutuk na’in 228 mak sei utiliza eskola refere.
