Hahú husi fulan Janeiru to’o Maiu 2025, Autoridade Inspensaun no Fiskalizasaun Atividade Ekonomia Sanitaria Alimentar (AIFAESA) rekolla koima hamutuk rihun-sianulu-resin-ida-atus-hitu-tolu-nolu-resin-lima ($91.735) durante halo inspesaun ba iha fatin komersiu 609 iha Município Díli no munisípiu sira seluk iha rai laran.
“Husi total 609 ne’e sira-ne’e mak komete infrasaun ne’e hamutuk 288,” hatete Inspetora Jerál AIFAESA, Odete da Silva Viegas, iha salaun CNE, Kolmera, Díli.
Nia akresenta, inspesaun ne’ebe AIFAESA halao inklui tama barak liu ba fatin komérsiu 438, tuir mai fatin turistiku hamutuk 133, no indústria ne’ebé mak timoroan sira halo iha Díli laran hamutuk fatin 20 ona, no restu fatin sira seluk.
Iha fatin hanesan Akademista husi Fakuldade Agrikultura iha UNITAL, Aniceto Pinto hateten, governu tenke tau duni atensaun ba setor komersiu nian ne’e, tanba barak mak faan sasan ne’ebé mak liu prazu.
“Servisu AIFAESA nian ne’e di’ak tebes, tanba bele halo kontrolu ba setór komérsiu sira iha ita nia rai, tanba dala barak loja sira-ne’e faan sasan hanesan, bebidas, ai-fuan, dosi sira-ne’e barak mak liu ona prazu, maibé sira kontinua faan,” nia dehan.
Nia hatutan, ema balun ba sei haree lai antes atu hola, maibé balun ba hola de’it la haree, ida-ne’e bele fó impaktu ba ema nia saúde.
“Husu ba AIFAESA atu kontinua halo kontrolu ba setór komersial sira-ne’e, bainhira hetan tenke multa, atu nune’e sira bele tauk,” nia esplika.
