Unidade Espesial Polísia (UEP) liuhusi Sesaun Explosive Ordnance Disposal (EOD) forma ona ekipa destroisaun arma funu antigu husi okupasaun Japanes, Portugál, no Indonézia iha kada munisípiu.
Komandante UEP Superintendente Damião da Silva Correia hatete, ekipa hirak ne’e mak halo destroisaun ba material restu funu nian hanesan Bom, Garnada, no seluk tan ne’ebé durante ne’e komunidade sira hetan.
Nia dehan, durante ne’e komunidade sira hetan bom kuaze atus ida (1) no sira informa ba komandu polísia munisípiu depois sira informa mai UEP no ekipa tun kedan ba halo destroisaun.
“Ita hotu akompaña bomba hirak ne’ebé mak iha territoriu laran tomak iha tempu invazaun, Japaun no Indonesia nian, agora sira husi ekipa EOD nian ba iha munisípiu hotu-hotu hodi halo destroisaun,” nia informa.
Nia hatete, dadaun ne’e ekipa ba halo destroisaun restu material funu nian iha Munisípiu Covalima nian sira ba halo indentifikasaun no depois halo kedas destroisaun.
“Ita-nia membru hirak ne’e sira hetan treinamentu husi Portugál nomos hetan apoiu ekipa avansadu husi Amerika nian, apoiu ekipamentu, hodi fasilita servisu destroisaun,” Komandante UEP Superintendente Correia salienta.
Alende ne’e nia dehan, tuir loloos destroisaun ba restu materia funu, maibé tenke adapta mós ba klima tanba tempu udan sira labele halo tanba risku ba sira-nia vida.
“Ita laiha ekipamentu salvamentu pesoal ninian hodi proteje sira-nia vida, maibé ha’u halo ona proposta ba Komandu Jerál hodi bele rezolve,” nia informa.
Nia dehan, ekipamentu ne’ebé durante ne’e sira utiliza hodi halo destroisaun restu material funu nian ne’e, apoiu husi Amerika nune’e mós Austrália apoiu robot ida.
Entretantu Komandante Jerál PNTL Komisáriu Henrique da Costa dehan, ekipamentu salvamentu pesoál ba UEP liu-liu iha EOD nian ne’e foin lalais halo ona tenderizasaun.
“Ita mós aprezenta ba Ministéru Interior, foin dadauk ba iha EOD ninian sira kompras ona kareta ida, espesífiku bá ekipamentu, bainhira ba iha munisípiu sira tenke uza mós ekipamentu, nomos eventu boot presiza utiliza ekipamentu robot,” nia dehan.Alende ne’e husu mós ba komandu munisípiu sira no polísia komunitariu atu fó avizu ba komunidade sira bainhira hetan arma funu antigu nian tenke informa ba polísia hodi bele halo destroisaun no labelesunu arbiru tanba risku ba ema-nia vida.
