Prezidente Repúblika Jose Ramos Horta husu Polísia Científikal Investigasaun Kriminál (PCIC) tenke servisu hamutuk ho Polísia Nasionál Timor-Leste (PNTL) hodi kontrolu krime organizadu sira iha Timor-Leste (TL).
Nia dehan, krime organizadu boot tebes iha mundu no rejiaun nune’e mós kontinua iha Timor-Leste, sai hanesan trajetu transaksaun ba matérial sira.
“Timor-Leste ita vunerável liu ba krime organizadu, instituisaun seguransa sira liu-liu PCIC tenke koopera ho PNTL hodi bele kontrolu,” PR Horta dehan iha serimónia aniversáriu PCIC ba dala XI iha salaun Multifunsaun GMN, Bebora, Díli.
Nia hatete, presiza servisu hamutuk iha área tasi no rai-maran, tanba atu identifika problema organizadu presiza tau taktika no kapasidade inkliu mós matérial hamutuk husi instituisaun PCIC no PNTL.
“Ha’u aparesia no PCIC no PNTL nune’e mós Falintil-Forsa Defeza Timor-Leste (F-FDTL) nia kapasidade di’ak tebes iha area sira-ne’e, tanba ne’e tenke tau matenek sira-ne’e hamutuk hodi halo intervensaun ba krime organizadu,” nia hatete.
Nia informa, krime organizadu ne’e la’os de’it droga, maibe tráfiku umanu, mony loundri, no seluk tan ne’ebé ligasaun iha mundu no terrorismu.
Entretantu, Diretór Ezekutivu PCIC Vicente Fernandes dehan, kapasidade no ekipamentu ne’ebé PCIC iha, sira bele servisu tuir adamentu ne’ebé iha no hetan apoiu husi PNTL bele kontrolu no kombate krime organizadu sira ho di’ak.
“Atu halo kontrolu no identifika krime organizadu sira presiza ita servisu apoiu malu,” nia dehan.
Nia hatete, PCIC sei la hakiduk ba kotuk hodi fó seguransa ne’ebé trankullu ba rai no povu Timor-Leste.
Iha parte seluk Komandante PNTL Komisáriu Henrique da Costa dehan, PNTL liuhusi sesaun investigasaun hala’o nia misaun kontrolu droga tuir lei, maibé sei la servisu mesak, maibé koopera ho PCIC.
“Ita sei halo servisu tuir baze legal sira, tanba susesu ba TL la depende de’it ba PCIC no ba PNTL, maibé servisu hamutuk hodi rezolve problema iha TL ne’e,” nia hatete.Nia dehan, PNTL no PCIC haree ba legalidade sira hodi orienta sira-nia servisu hodi kontrolu krime organizadu ne’ebé mak ameasa Timor-Leste.
