Govermu liuhusi Institutu Nasionál Defeza Direitu Labarik (INDDICA) seidauk implementa lei númeru 6/2023 ho di’ak, tanba seidauk produz modul hodi integra ba Sentru Formasaun Jurídiku (SFJ).
Prezidente INDDICA Dinora Granadeiro dehan, INDDICA realiza semináriu ho autór judisiáriu sira oinsá atu implementa lei refere ho di’ak hodi fó protesaun ba labarik no joven baihira hasoru asaun perigu sira.
“Tanba seidauk produz modul hodi integra iha SFJ nune’e autor juridisial sira bele intende hodi halo prosesu,” Prezidente INDDICA Granadeiro dehan.
Nia informa presiza dezenvolve módulu ida ne’ebé ko’alia konaba lei protesaun labarik no joven iha perigu nune’e integra ba SFJ hodi sai hanesan matéria ba formasaun autor judisiáriu sira bele intende.
“Lei ne’e di’ak tebes, kuaze instituisaun implementadór sira seidauk hatene, tanba ne’e presiza formasaun,” nia salienta.
Nia dehan ho inisiativa seminariu refere hodi divulga lei ba autor judisiáriu sira hodi buka mekanizmu oinsá bele implementa lei ho maximu no instituisaun idak-idak hodi hala’o nia responsabilidade.
Iha fatin hanesan, Prezidente Tribunál Rekursu Afonso Carmona dehan, lei ne’e halo hodi rezolve problema ne’ebé labarik no joven sira hasoru. Tanba ne’e autór judisiáriu sira tenke intende di’ak kona-ba lei ne’e nia hakarak.
“Liuhusi semináriu ida ne’e bele hetan konteúdu husi lei ne’e karik bele altera liga ho situasaun real iha Timor-Leste hodi aplika,” nia dehan.
Nia dehan, lei ne’e mós bele tama iha programa reforma setor justisa nune’e bele liga ba situasaun real.”Atu implementa ho másimu ita-nia autór judisiáriu sira tenke hatene uluk kona-ba konteúdu husi lei refere bele utiliza ho di’ak hodi rezolve problema labarik no joven sira-nian,” nia hatete.
