Kriasaun Supremu Tribunál Justisa (STJ) sai prioridade ba Prezidente foun Tribunál Rekursu (TR) Afonso Carmona durante nia mandatu.
Prezidente TR Carmona dehan, tempu to’o ona atu kria STJ, nudar lribunál aas liu iha rai laran, nune’e mós hodi halo esplikasaun ba lei sira hodi fasilita komunidade bele komprende kona-ba prosesu lejislativu no justisa ni’an.
“Iha ha’u-nia mandatu nu’udar Prezidente [Tribunál Rekursu] fó uluk prioriadade ba kriasaun Supremu Tribunál Justisa. No mós hodi halo esplikasaun ba lei sira no fasilita sidadaun komprende kona-ba desizaun sira husi Tribunál,” nia dehan.
Nia hatete, dadaun ne’e prepara ona dezeñu, rekursu umanu, hodi haree se mak sei ba tur iha ne’ebá hodi hala’o knaar sira-ne’e.
“Ha’u sei institusionaliza Supremu Tribunál Justisa, tanba sai ona parte ida husi ha’u-nia komprimisiu durante mandatu,” Prezidente TR Carmona dehan iha semináriu Implementasaun Lei fó Protesaun ba Labarik no Joven husi Perigu, iha Díli.
Nia haktuir katak halo ona komunikasaun ho governu hodi reverifika ba dezeñu STJ nian nune’e oinsá bele estabelese.
Entretantu, Deputadu Duarte Nunes dehan, ezisténsia STJ nian hodi kria kondisaun ba juis sira ho karreira no esperiénsia jestaun halo rekursu nian, tanba dadaun ne’e STJ nia funsaun sei hala’o hela husi TR.
“Enkuadramentu jurídiku permite tebes ba oin atu estabelese STJ hodi hala’o misaun administrativu fiskál ba julgamentu ne’ebé justu no halo esplikasaun ba desizaun husi Tribunál Distrital sira ba sidadaun nune’e bele komprende,” nia hatete.
Nia dehan, natureza Tribunál Distrital hanesan Tribunál Juridisaun komun, tanba ne’e posibilidade bele iha duplikasaun, tanba ne’e presiza STJ hodi bele hala’o nia knar tuir espesialidade sira.
“Ita presiza Supremu Tribunál Justisa hodi promove uniformidade iha esplikasaun lei no regulamentu hotu iha Timor-Leste aplika ho forma justu no korretu ba sidadaun,” Deputadu Nunes informa iha PN.Nia dehan, ema hotu nia esperansa atu bele iha ona STJ hodi nia misaun hodi fó justisa ba sosiedade.
