Uma-kain 64 ne’ebe monu vitíma inundasaun ne’ebe akontese iha 4 de Abríl 2021 iha Hera, Munisipiu Dili, seidauk hetan apoiu rekuperasaun ba sira-nia hela fatin, no tanba ne’e sira kontnua hela iha Fundasaun Haburas nia sede laran.
“Momentu inundasaun 4 de Abríl ne’e sira-nia uma mota sobu hotu no sasan sira iha uma-laran laiha ida mak salva,” dehan Porta-Voz Uma-kain 64 sira, Aquilis da Silva.
Nia dehan, iha momentu ne’ebá depois de inundasaun refere ekipa husi protesaun sivíl no Munisipál Díli tun ba fatin akontesimentu hodi evakua sira ba iha Fundasaun Haburas no foti dados husi vitíma sira.
Nia informa, kona-ba apoiu emerjénsia sira hetan ona, maibé apoiu rekuperasaun ba hela fatin mak seidauk.
“Ami vitíma inundasaun 4 de Abríl iha área Hera Kampug-baru hamutuk uma-kain 64 to’o ohin loron seidauk hetan apoiu rekuperasaun ba ami-nia hela fatin husi governu,” nia hatete.
Nia dehan, sira seidauk fila ba hela fatin no kontinua hela iha Fundasaun Haburas, tanba sira laiha hela fatin.
Nia husu governu atu tau atensaun ba sira, tanba iha momentu ne’e sira-nia naran tama hotu iha lista apoiu rekuperasaun, maibé laiha apoiu hodi konstrui fila-fali sira nia hela fatin.
Entretantu, Xefe Suku Hera, Antoninho Marcos da Silva dehan, problema ne’e vitíma hirak ne’e autoridade suku nian hato’o ona ba governu.
“Ita-nia komunidade uma-kain 64 ne’e sira-nia uma bee sobu hotu no estragus totál, sira iha direitu ba apoiu rekuperasaun,” nia hatete.
Nia dehan, vitíma hirak ne’e kontinua hela iha fatin akollamentu Fundasaun Haburas no balun dada fali lona hodi hela atu sira-nia atividade hortikultura.
“Ha’u nafatin esforsu halo aproximasaun ba governu hodi bele reverifika fali dadus vitíma hirak ne’e nian nune’e bele rezolve sira nia problema hanesan ho vitíma inundasaun sira seluk,” Xefe Suku HeraSilva hatete.
Entretantu, Xefe Relasaun Externa Autoridade Protesaun Sivíl (APC) Nelson Nunes de Orleans dehan, vitíma sira iha Suku Hera ne’e sei tama fali ba iha prosesu reverifikasaun hodi bele hatene sira tama iha estragus tipu ida ne’ebé.
“Dadaun ne’e ita-nia ekipa sei tun fali ba halo verifikasaun fila-fali nune’e bele hatene, sira merese tama iha apoiu rekuperasaun ka lae,” nia hatete.Nia dehan, karik sira tama iha tipu rekuperasaun governu tenke apoiu rekuperasaun hodi trata vitíma hotu hanesan.
