Komunidade husu ba governu liuhusi Ministériu Transporte no Komunikasaun (MTK) atu halo manutensaun ba zebra cross iha dalan públiku sira iha kapitál Díli, tanba bele fó risku ba ema nia vida bainhira ultrapasa iha estrada.
Komunidade Anastasia da Costa dehan, dadaun ne’e zebra cross hodi fasilita komunidade sira atravesa iha dalan públiku maiória lakon hotu ona.
Nia dehan, ezemplu iha área Mandarin nian, Timor-Plaza, Bidau, tinta zebra cross laiha ona, oinsa ema bele sente seguru bainhira ultrapasa, laiha sinal ida ne’ebé mak fó atensaun ba motorista sira hodi fó espasu ba komunidade hodi ultrapasa.
“Ita husu governu tenke halo manutensaun ka pinta fila-fali zebra cross sira iha dalan públiku sira hodi fasilita komunidade ultrapasa ho seguru,” nia husu.
Nia dehan, bainhira laiha zebra cross risku tebes ba ema nia vida. Tanba ne’e governu tenke tau atensaun ba asuntu ne’e.
“Bainhira ita la’o tama iha zebra cross ne’e ho kareta motorizada hadaun malu de’it, ita-nia vida laseguru,” nia salienta.
Aleinde kapitál Díli, Komandante Polísia Munisípiu Liquiça Superintendente Paulino Carmo Pereira, dehan, iha área Liquiça nian hahú husi Portu Tibar, Lauhata, to’o Loes ne’e tinta lakon hotu ona. Ne’e kompeténsia governu nian hodi rezolve atu kleur ka lalais.
“Ita sempre ba halo sosializasaun iha eskola suku sira, estudante no komunidade sira sempre husu kona-ba zebra cross ne’ebé mak tinta lakon ona,” nia dehan.
Nia hatete, hanesan polísia kontrolu de’it sinais tránzitu sira ne’ebé mak governu estabelese. Maibé fiar katak governu iha meiu barak hodi pinta fila-fali zebra cross sira.
Entretantu, Ministru ba Ministériu Transporte no Komunikasaun (MTK) Miguel Marques Manetelo dehan, problema zebra cross tinta lakon ne’e tinan ida-ne’e seidauk bele rezolve tanba orsamentu laiha.
Nia hatete, iha orsamentu jerál estadu tinan 2025 ne’e kapitál dezenvolvimentu ne’e zero, tanba ne’e governu seidauk pinta fila-fali.
“Maibé ita buka meiu oinsa atu bele rezolve. Tanba ne’e ita koalia ona ho parseiru balun hodi bele apoiu ita halo manutensaun ba zebra cross sira ne’e tinta lakon ona iha dalan públiku sira,” nia informa.
Nia dehan, governu identifika ona zebra cross sira maiória tinta lakon hotu ona, tantu iha Díli no munisipíu, tanba pinta ona iha tinan 2015 no 2016 ne’e.
“Pinta kleur ona, depois tempu udan loro, tinta tenke lakon, ita nafatin esforsu oinsa atu bele pinta fali,” Ministru MTK Manetelo dehan.Alende ne’e nia informa, dadaun hein hela resposta husi parseiru balun hodi bele responde ba zebra cross iha dalan públiku sira.
