Institutu Apoiu Dezenvolvimentu Empresariu (IADE) introdus planu negósiu inovativu ba joven sira na’in atus haat neen-nulu resin-neen (466) iha teritoriu nasionál atu nune’e sira bele tuir kompetisaun ne’ebé IADE sei realiza iha tinan 2025 ne’e.
Diretor ezekutivu IADE, Filomeno Marcelino Belo hateten atividade ne’ebé hala’o hanesan parte ida ba kompetisaun ne’ebé fó oportunidade ba joven sira ne’ebé remata ona estudu iha nivel sekundária no ensinu superiór.
“Ita-nia joven sira ne’ebé mai tuir ona kompetisaun ida-ne’e, sira ne’ebé mak sai manan nain ba kompetisaun negósiu, sei hetan apoiu orsamentu no ekipamentu husi IADE, hanesan iha tinan kotuk ita halo ona,” dehan Diretór Belo hafoin remata hasoru malu ho joven sira iha salaun Katedral, Díli.
Nia hatutan, ba joven sira ne’ebé manan iha kompetisaun sei hetan apoiu husi IADE durante tinan rua.
“Agora dadaun joven sira mai ne’e lori loos de’it sira-nia ideia, entaun joven sira tenke iha ideia ne’ebé mak inovativu atu sira manan iha kompetisaun ida-ne’e, bainhira manan mak IADE sei apoiu sira no halo mós kontrola ba sira-nia atividade loron-loron nian,” nia esplika.
Iha fatin hanesan partisipante Sonya dos Reis hateten, ida ne’e hanesan oportunidade di’ak ba sira atu hodi aumenta di’ak liutan sira-nia kapasidade iha área negósiu nian.
“Ha’u senti kontenti, tanba kompetisaun ida-ne’e bele aumenta di’ak liu tan ha’u-nia kapasidade iha area negósiu nian,” nia dehan.
Nia hatutan, atividade refere fó motivasaun no inspirasaun ba jovem sira atu hasa’e koñesimentu no forma kreativu kona-ba solusaun problema ne’ebé sira hasoru.
“Joven sira bele fó kontribuisaun boot ba dezenvolvimentu nasaun, liu-liu amenta koñesimentu di’ak liu tan iha área negósiu nian,” nia afirma.
Nia salienta, joven barak mak iha kriatividade ba negósiu, maibé labele realiza, tanba la iha osan.”Ami hakarak halo negósiu rasik, maibé osan mak la to’o atu hodi halo negósiu, tanba ne’e ami husu ba governu bele ajuda netik ami hodi bele halo ami-nia negósiu rasik,” nia akresenta.
