Ministru ba Ministériu Agrikultura Pekuaria Peska no Floresta (MAPPF) Marcos da Cruz hateten, distribui tratór boot hitu (7) ba sentru tolu inklui Loes, Betano no Darsula Baucau, hodi hasa’e produsaun ai-han iha rai-laran.
“Ita iha sentru boot tolu ne’ebé estabelese kedas iha governu uluk nian, nune’e sentru sira-ne’e ita presiza funsiona, tanba tuir peskiza ne’ebé ita halo iha fatin tolu ne’e, iha produsaun di’ak, hanesan iha Loes mak batar, Betano mós batar no Darsula Fore-rai.
Fatin sira-ne’e ita presiza hadi’a halo di’ak, tanba ne’e mak ita distribui tratór ba fatin sira-ne’e,” dehan Ministru ba MAPPF iha nia servisu fatin Comoro, Díli.
Nia hatutan, governu fahe ona tratór sira-ne’e ba agrikultór sira, hodi ajuda sira halo servisu, maibé fila fali ba ema ida-idak nia koñesimentu, no haree mós ba infraestrutura, tanba liuhusi problema sira ne’e mós bele fó impaktu ba hasae produsaun.
“Ita ko’alia kona-ba hasa’e produsaun ne’e tenke haree mós ba agrikultura sira-nia konsiénsia hakarak halo toos ka lae, agrikultór balun la hatene uza ekipamentu sira-ne’e, entaun ita presiza fó uluk formasaun sira, balun mós lakohi halo to’os ona, ida mós ita-nia irrigasaun natar sira-ne’e di’ak ka lae, ita tenke haree ba parte sira-ne’e hotu, se lae ita fó tratór ba mós sira labele halo buat ida, tanba fatór sira-ne’e,” nia esplika.
Nia hatutan, governu sei servisu hamutuk ho komunidade atu hasae produsaun.
“Ita nafatin esforsu atu servisu hamutuk ita-nia agrikultór sira, tanba sira mak halo toos halo natar hakiak animál sira, ita nafatin ho sira atu nune’e bele aumenta ita-nia produsaun,” nia afirma.
Nia salienta tan katak, tékniku sira ne’ebé iha sentru sira atu kuidadu ekipamentu sira-ne’e ho di’ak, atu nune’e bele uza ba tinan naruk.
Iha fatin hanesan reprezentante Sentru Peskiza Darsula Baucau Juleta Lidia agradese ba MAPPF, tanba bele oferese ona tratór ba sira.
“Sentru Darsula nia nutrisaun la hanesan ho sentru sira seluk, ita bele hateten katak sentru ne’e nia rai nutrisaun ne’e krekas liu, entaun liuhusi tratór ne’e bele ona ajuda ami, hodi utiliza fila rai ho di’ak, nune’e bele hasa’e fali nutrisaun rai nian, hodi bele hasa’e produsaun,” nia dehan.
Nia dehan, sira mós halo ona peskiza kona-ba oinsa uza adubu orgániku hodi hasae nutrisaun rai nian. “Ami halo ona peskiza ida oinsá atu uza adubu orgániku ba rai, tanba iha ne’ebá rai la iha nutrisaun di’ak, entaun ami uza adubu orgániku hodi bele hasa’e produsaun, hanesan batar no fore rai,” nia akresenta.
