Xefe Estadu Maiór Jerál Falintil-Forsa Defeza Timor-Leste (F-FDTL) Tenente Jenerál Domingos Raúl Falur Rate-Laek dehan, governu tenke trata veteranus militár sira ho di’ak antes reforma.
Nia hatete, tuir dadus ne’ebé Komandu F-FDTL iha katak dadaun ne’e veteranus hamutuk na’in 80 mak sei kontinua hala’o knaar hanesan militár iha Instituisaun F-FDTL laran.
“Ha’u husu ba governu tenke kria kondisaun no trata veteranus sira ho dignu bainhira sira ba idade reforma no fila ba vida sivíl,” nia informa.
Nia dehan, veteranu sira refere dadun ne’e komandu hahú rekolla ona dokumentu sira hodi trata ba reforma, maibé tenke kria kondisaun ba sira.
Nia informa, tuir planu veteranus na’in 80 ne’ebé sei ativa iha Instituisaun F-FDTL ne’e sei reforma iha dia 20 de Agosto 2025.
“Sira ba ona reforma maibé, sira la’ós reforma de’it hanesan ne’e, estadu tenke trata sira ho di’ak hodi valoriza sira-nia sakrifísiu durante luta ba ukun an,” nia hatete.
Nia informa, veteranus sira ne’ebé sei ativa iha instituisaun F-FDTL ne’e fahe ba klasifikasaun luta ba libertasaun nasional, balun iha tinan 24, balun iha kontribuisaun ba luta 15 a 19, 8 a 14, no 4 a 7 tinan.
Entretantu, Ministru ba Ministériu Defeza Kontra Almirante Donaciano Costa Gomes “Pedro Klamar Fuik” dehan, governu hato’o ona proposta lei ida hodi halo alterasaun ba estatutu militar, nune’e atu bele dignifika veteranus sira ne’ebé ativu iha instituisaun F-FDTL, no proposta ne’e aprova ona iha Konsellu Ministru.
“Lei ne’e sita mós kriteriu balun kona-ba sira-nia direitu sira, karik sira atu ba reforma, no ita sei tau matan ba ida-ne’e nafatin para sira labele sente katak laiha dignifikasaun ba sira. Tanba iha lei foun ne’e hatete hotu sira-nia pensaun no saida mak sira sei halo. Prosesu administrativu ba ida-ne’e la’o hela,” nia infoma.
Iha parte seluk, Membru Komisaun B iha Parlamentu Nasionál, Deputada Lídia Norberta dos Santos Martins hatete, veteranu sira merese atu hetan moris ne’ebé di’ak iha independénsia ida-ne’e, tanba uluk sira terus ba rai ne’e.
“Sira fó an tomak ba nasaun ida-ne’e luta durante 24 anos. Tanba ne’e estadu presiza trata sira ho di’ak,” nia dehan.Nia dehan, tempu to’o ona atu sira bele moris di’ak goza dezenvolvimentu ida-ne’e, estadu no governu iha responsabilidade atu tau matan ba sira hodi kria moris dignu ba sira.
