Institutu Nasionál Saúde Públiku Timor-Leste (INSP-TL) servisu hamutuk ho parseiru sira hodi halo konsulta kona-ba modulu treinamentu jestaun lideransa ba nivel kuidadu saúde primaria.
Presidente INSP-TL, Merita Monteiro hateten, grupu traballu refere bele kria modulu formasaun jestaun lideransa hodi fó solusiona ba sistema saúde ne’ebé la’o seidauk loos.
“Ita hamutuk iha fatin ida-ne’e hodi solusiona modulu foun ba jestaun lideransa nian, tanba ita boot sira mak hatene diak liu kona-ba área jestaun nian, tanba ne’e ita halibur malu iha ne’e hodi bele solusiona modulu ida-ne’e,” dehan Presidenti INSP-TL liuhusi nia diskursu, iha Salaun City 8, Manleuna, Díli.
Nia hatutan, objetivu ba modulu ne’e mak oinsá atu bele solusiona problema saúde nian ne’ebé mak durante la latuir koridór.
“Ita hotu jestór entaun ita hotu nia kapasidade atu entende kona-ba jestaun ne’e la hanesan, entaun liuhusi modulu ida-ne’e bele ajuda ita hodi halo jestaun ne’ebé di’ak,” nia afirma.
Nia salienta, diskusaun ida ne’e bele hetan solusaun ne’ebé di’ak hodi kria modulu foun ba jestor sira hodi halo jestaun ba medikamentus, komsumiveis no rekursu humanu iha sira-nia servisu fatin.
Iha fatina hanesan, Primeiru Sekretaria Saúde Nutrisaun husi Department of Foreign Affairs and Trade (DFAT) Austrália Deidre Ballinger hatete, governu Australia prontu apoiu Timor-Leste.
“Ho ksolok tebes bele apoiu Ministériu Saúde no halo esforsu hamutuk hodi fó sai informasaun kliniku ou non kliniku ba ita-nia profesional saúde sira no espesialmente bele servisu hamutuk ho INSP-TL hodi rezolve modulu foun ida-ne’e,” nia dehan.
Diretora Ezekutiva Asosiasaun Maluk Timor (AMT), Dillyana Ximenes hatete Maluk Timor hamutuk INSP-TL hodi kria modulu refere ho di’ak liu tan.
“Ami-nia komitmentu atu servisu hamutuk nafatin ho INSP-TL no hetan apoiu husi governu Australia hodi kria modulu ba grupu traballu ida-ne’e iha futuru,” nia esplika.
Nia hatutan, liuhusi diskusaun ne’e bele hetan solusaun positivu hodi produs modulu foun ba jestaun lideransa ba saúde primaria nian iha Timor-Leste.
